Boks. Meıvezerdiń ákesi Golovkınge shart qoıdy

ASTANA. 22 maýsym. Belgili kásipqoı boksshy Floıd Meıvezerdiń ákesi ulynyń Gennadıı Golovkınmen judyryqtasýy úshin óz shartyn aıtty. Bul týraly vringe.com habarlady. Qazirgi tańda barlyq salmaq boıynsha álemniń eń úzdik boksshysy sanalatyn Meıvezer búginge deıin 48 jekpe-jek ótkizip, bárinde jeńiske jetken. Sonyń 26-synda qarsylasyn nokaýtpen tize búktirdi. Amerıkandyq 69,9 kıloǵa deıingi salmaq dárejesinde judyryqtasady. Al Golovkınniń orta salmaqta (72,6 kılo) baq synaıtyny belgili. Soǵan qaramastan, otandasymyz birneshe ret Meıvezerdi jekpe-jekke shaqyryp, onymen kezdesý úshin salmaǵyn aýystyrýǵa daıyn ekenin málimdegen edi. Osyǵan baılanysty úlken Meıvezer óz shartyn jarııa etti. Iаǵnı, ol eger qos boksshy jekpe-jek ótkizýge kelisip jatsa, kelisim shartta kezdesý bolatyn kúni mindetti túrde salmaq ólsheý týraly jazylýy tıis dep otyr. Sebebi, onyń oıynsha, qazaqstandyq boksshy salmaq ólsheý rásimi men jekpe-jek ótetin kúnge deıingi aralyqta aıtarlyqtaı qýat jınaıdy eken. Nátıjesinde, Gena sharshy alańǵa sýper orta salmaq tipti jartylaı aýyr salmaq dárejesindegi boksshylardyń deńgeıinde shyǵady. Úlken Meıvezer Boxingscene-ge bergen suhbatynda: «Eger men Floıd bolsam, Golovkınniń salmaǵyna erekshe mán berer edim. Sondaı-aq, onyń ólshengen kezdegi salmaǵy jekpe-jek ótetin kúni de saqtalatynyna kepildik bolsa, esh alańsyz judyryqtasamyn», – dedi. Aıta keteıik, eki sportshy da kelesi jekpe-jekterin aldaǵy qyrkúıek aıynda ótkizýdi josparlap otyr. Gennadıı Golovkın óz salmaq dárejesinde WBA (Super), WBC (Interim) jáne IBO, al Meıvezer WBC men WBA (Super) tujyrymdary boıynsha álem chempıony. Búginge deıin otandasymyz 33 kezdesý ótkizip, barlyǵynda jeńiske jetti. Sonyń 30-ynda qarsylasyn nokaýtqa jiberdi. Elaman Qońyr. Derek: vringe.com. Sýret: telegraf.com.