Foto: Saýda jáne ıntegrasııa mınıstrligi
Forým aıasynda jalpy somasy 180 mıllıon eýrony quraıtyn 10 memorandýmǵa qol qoıyldy. Bul eki eldiń isker toptary arasyndaǵy joǵary senim deńgeıi men ózara is-qımyldy sapaly jańa deńgeıge kóterýge daıyn ekenin kórsetedi. Jobalar strategııalyq salalardy qamtıdy, atap aıtqanda, mashına jasaý, munaı hımııasy, aýyl sharýashylyǵyn qaıta óńdeý, metallýrgııa, logıstıkalyq prosesterdi sıfrlandyrý jáne Qazaqstan aýmaǵynda birlesken óndirister qurý arqyly Eýropa, Ortalyq Azııa jáne Qytaı naryǵyna shyǵý.
QR Saýda jáne ıntegrasııa mınıstri Arman Shaqqalıev forým Qazaqstan men Italııa arasyndaǵy ekonomıkalyq qatynastardyń jańa kezeńiniń bastalýyn bildiretinin atap ótti.
«Búgingi forým saýda-ekonomıkalyq áriptestikti nyǵaıtýdyń negizgi alańyna jáne jahandyq ózgerister jaǵdaıyndaǵy strategııalyq dıalogqa umtylystyń sımvolyna aınaldy. Qazaqstan Italııa Respýblıkasymen jan-jaqty, pragmatıkalyq jáne uzaq merzimdi yntymaqtastyqty damytýǵa erekshe mán beredi. Biz tek saýdany keńeıtip qana qoımaı, sonymen qatar jahandyq logıstıka qaıta qurylyp, proteksıonızm men álemdik ekonomıkanyń sıfrlanýy kúsheıip jatqan kezde halyqaralyq jetkizý tizbekteriniń turaqtylyǵyn qamtamasyz etýge qabiletti turaqty ári ınnovasııalyq ekojúıe qalyptastyryp jatyrmyz», dedi mınıstr.
Sondaı-aq ol Qazaqstan ózin tek resýrs jetkizýshi ǵana emes, Eýrazııanyń kólik, óndiristik jáne tehnologııalyq haby retinde kóretinin aıtty. Osyǵan baılanysty Transkaspıı halyqaralyq kólik baǵytyn (Orta dáliz) damytýǵa erekshe nazar aýdaryldy, ol geoekonomıkalyq ózgerister aıasynda dástúrli baǵyttarǵa ornyqty ári básekege qabiletti balama retinde mańyzdylyqqa ıe bolyp otyr. 2024 jyly bul baǵyttaǵy tasymal kólemi 63%-ǵa artyp, 4,1 mln tonnany quraǵan, al konteınerlik tasymaldar 2,6 esege ósip, 50,5 myń JFE-ge jetken.
Taraptar dástúrli saýda almasýdan birlesken óndiristik ınfraqurylym qalyptastyrýǵa kóshýge daıyn ekenderin kórsetti. Perspektıvaly baǵyttar qatarynda – Qazaqstan-Italııa bastamalaryn qoldaıtyn ınvestısııalyq qor qurý, «Digital Supply Chain 4.0» sıfrlyq platformasyn damytý, eksporttyq jáne ınvestısııalyq táýekelderdi birlesip saqtandyrý tetikterin engizý, sondaı-aq bolashaq jobalardyń zamanaýı ekologııalyq jáne áleýmettik standarttarǵa saı bolýyn qamtamasyz etetin ESG jol kartasyn jasaý bar. Qazaqstan tarapynan usynylǵan negizgi bastamalardyń biri – «Made in Kazakhstan with Italy» birlesken brend qurý ıdeıasy boldy. Bul brend tereń tehnologııalyq kooperasııanyń jáne joǵary básekege qabiletti ónimdi birlesip óńdeý men eksporttaýǵa kóshý úrdisiniń sımvolyna aınala alady.
Agroónerkásiptik kooperasııa da basty nazarda boldy. Qazaqstan organıkalyq bıdaı, maıly daqyldar men mal azyǵyn eksporttaýdy ulǵaıtýǵa daıyn ekenin bildirip, halyqaralyq naryqqa baǵyttalǵan biryńǵaı brendpen aýyl sharýashylyǵy ónimderin birlesip óńdeý jáne býyp-túıý jelilerin qurýdy usyndy.
Ekijaqty saýda dınamıkasy tereńdetilgen áriptestiktiń ózektiligi men qajettiligin dáleldep otyr: 2024 jyldyń qorytyndysy boıynsha Qazaqstan men Italııa arasyndaǵy taýar aınalymy 19,9 mlrd dollardy (+24%) quraǵan. Onyń ishinde Qazaqstannan eksport – 18,7 mlrd dollardy (+25,8%) qurasa, Italııadan ımport – 1,3 mlrd dollardy (+2,2%) qurap, mashına jasaý ónimderin, medısınalyq preparattar men óndiristik jabdyqtardy qamtydy.
Alaıda, mınıstr A.Shaqqalıev atap ótkendeı, bul kórsetkishter – áleýettiń bir bóligi ǵana.
Qazaqstan men Italııa ózara senimge, tehnologııalar almasýyna, óndiristi jergiliktendirýge jáne ornyqty logıstıkaǵa negizdelgen múldem jańa formattaǵy áriptestik qura alady.
