Máýlen Áshimbaev meımanǵa iltıpat bildire kelip, Germanııa Qazaqstannyń Eýropalyq odaqtaǵy strategııalyq seriktesi ekenin aıtty. Senat spıkeri atap ótkendeı, dıplomatııalyq qarym-qatynas ornaǵaly beri Qazaqstan men Germanııa arasynda senimdi saıası dıalog jolǵa qoıyldy. Sondaı-aq saýda-ekonomıkalyq jáne ınvestısııalyq yntymaqtastyq pen mádenı-gýmanıtarlyq baılanystar da nátıjeli damyp keledi.
– Memleket basshysy Qasym-Jomart Toqaev Qazaqstan men Germanııa arasyndaǵy dostyq jáne ózara tıimdi qarym-qatynasty nyǵaıtýǵa únemi basa mán beredi. Buǵan keıingi úsh jylda Germanııanyń Federaldy Prezıdenti Frank-Valter Shtaınmaıerdiń, Qazaqstan Prezıdenti Qasym-Jomart Toqaevtyń jáne Germanııanyń Federaldy Kansleri Olaf Sholstyń ózara saparlary aıqyn dálel. Sonymen qatar byltyr Yntymaqtastyq týraly birlesken deklarasııaǵa qol qoıylǵany belgili. Bul strategııalyq seriktestikti odan ári nyǵaıtý jolyndaǵy mańyzdy qadam boldy. Biz Senat tarapynan zańnamalyq qoldaý kórsetýge jáne barlyq kelisimdi tıimdi iske asyrý jolynda birlesip jumys isteýge daıynbyz, – dep palata tóraǵasy Býndesrat Prezıdentiniń bul sapary elder arasyndaǵy qatynastardy odan ári ilgeriletýge eleýli serpin beretinine senim bildirdi.
Suhbat kezinde Máýlen Áshimbaev pen Anke Relınger parlamentaralyq baılanystardy nyǵaıtý perspektıvalaryna, onyń ishinde zań shyǵarý qyzmetinde tájirıbe almasýǵa qatysty máselelerge de nazar aýdardy.
– Parlamentaralyq dıalog elderimiz arasyndaǵy yntymaqtastyqty nyǵaıtý jolynda mańyzdy ról atqarady. Osy baǵyttaǵy alǵashqy qadam retinde salalyq komıtetter jáne Senat pen Býndesrat apparattary arasynda jumys baılanystaryn ornatýǵa mol múmkindik bar. Bizdiń Parlamenttiń eki palatasynda da Germanııamen dostyq toptary jumys isteıdi. Bul toptardyń qyzmeti ekijaqty yntymaqtastyqtyń mańyzdy tetigi sanalady. Olardyń áleýetin barynsha belsendi paıdalanýǵa bolady, – dedi M.Áshimbaev.
Sonymen qatar kezdesýde Ortalyq Azııa – Germanııa strategııalyq seriktestik ornatqan aımaq ekeni sóz boldy. Osyǵan baılanysty palata tóraǵasy saýda-ekonomıkalyq, ınvestısııalyq yntymaqtastyq, sondaı-aq jasyl ekonomıka jáne óńiraralyq ózara is-qımyl salalaryn damytýdy zańnamalyq turǵydan qoldaýdy kózdeıtin birlesken jumystyń negizgi baǵyttaryna toqtaldy.
– Býndesrat – «jer palatasy» ekenin bilemiz. Senat ta – Qazaqstandaǵy óńirlerdiń múddesin qorǵaıtyn palata. Sondyqtan biz elderimizdiń óńirleri arasynda baılanys ornatýǵa múddelimiz. Jasyl energetıka, kólik jáne logıstıka, ekologııa jáne aýyl sharýashylyǵy, týrızm sııaqty sektorlar ózara tıimdi yntymaqtastyqtyń perspektıvaly baǵyttary bola alady. О́ńirler arasyndaǵy baılanystardy nyǵaıtý isinde federatıvtik jerler ókilderimen de belsendi yntymaqtastyq ornatýǵa daıynbyz, – dep Senat spıkeri delegattarǵa Qazaqstanda júzege asyrylyp jatqan keshendi reformalardyń negizgi máni men mańyzy jóninde aıtyp berdi.
О́z kezeginde Anke Relınger Qazaqstandaǵy áleýmettik-ekonomıkalyq jáne saıası ózgeristerge joǵary baǵa berdi jáne eki eldiń yntymaqtastyǵy odan ári nyǵaıa túsetinine senim bildirdi.
Kezdesýde rýhanı dıplomatııany damytý máselesine de erekshe kóńil bólindi. Bul rette bıylǵy qyrkúıekte Qazaqstanda ótetin Álemdik jáne dástúrli dinder kóshbasshylarynyń VIII sezine daıyndyq barysy áńgimege arqaý boldy.
