Sýretti túsirgen – Igor BÝRGANDINOV
Jańa mádenı nysan – eki el arasyndaǵy kópjyldyq yntymaqtastyq pen senimniń, sondaı-aq eki el basshylary arasyndaǵy dostyq qarym-qatynas pen ózara qurmettiń bir kórinisi ispettes.
Alleıanyń ashylý rásimine elimizdiń Mádenıet jáne aqparat mınıstri Aıda Balaeva men Reseı Federasııasynyń Mádenıet mınıstri Olga Lıýbımova bastaǵan reseılik delegasııa men Astana qalasynyń ákimi Jeńis Qasymbek qatysty.
Is-shara barysynda Aıda Balaeva eki el arasyndaǵy qarym-qatynasta mádenı yntymaqtastyqtyń orny erekshe ekenin atap ótti. Onyń aıtýynsha, qos tarap birlesken kórmeler uıymdastyryp, shyǵarmashylyq ujymdardyń gastrolderin, kınofestıvalder ótkizip jatyr. Odan bólek, Mádenı-gýmanıtarlyq yntymaqtastyq jónindegi kishi komıssııa jemisti jumys istep jatqanyn da tilge tıek etti. Atap aıtsaq, eki eldiń mádenı kúnderi, Qazaqstanda «Orys maýsymdary» mádenı-gýmanıtarlyq jobasy jáne «Aýqymdy gastrolder» baǵdarlamasy sátti júzege asyp keledi.
«Mádenıet árqashan halyqtardy jaqyndastyratyn kópir bolyp keledi. О́ner, til, dástúr men mýzyka arqyly biz bir-birimizdi tereńirek tanımyz, ereksheligimizdi túsinýge ári qurmetteýge úırenemiz, ortaq qundylyqtardy tabamyz. Sondyqtan da Máńgilik dostyq alleıasy – halyqtarymyzdyń rýhanı birliginiń, ortaq tarıh pen keleshekke baǵyttalǵan yntymaqtastyqtyń aıqyn belgisi. Bul oryn bolashaqta birlesken mádenı jobalar júzege asatyn, sýretshiler, mýzykanttar, akterler, tarıhshylar men jas talanttar bas qosatyn alańǵa aınalaryna senemin. Alleıa – urpaqtan-urpaqqa jalǵasar senim men qurmet, ortaq qundylyqtardy saqtaý qajettigin eske salyp turatyn rámiz», dedi A.Balaeva.
Reseı Mádenıet mınıstri Olga Lıýbımova eki el arasyndaǵy mádenı baılanystardy nyǵaıtýǵa nıetti ekenin aıtty.
«Dostyq alleıasyn ashý qurmeti eki eldiń Mádenıet mınıstrligine berilip otyr. Mádenı baılanystar, ortaq qundylyqtar men tarıh halyqtar dostyǵynyń berik tiregi ekeni sózsiz», dep atap ótti O.Lıýbımova.
Alleıada 200-den asa emen aǵashy men 50 myńnan asa kópjyldyq sándik buta bar. Sondaı-aq eki el arasyndaǵy mádenı-gýmanıtarlyq baılanystardy nyǵaıtýǵa arnalǵan is-sharalar aıasynda «Mádenı dıalog: Qazaqstan – Reseı» atty dóńgelek ústel ótti. Alqaly jıynǵa qos eldiń shyǵarmashylyq jáne ǵylymı zııaly qaýymy qatysty. Jıyn barysynda teatr óneri, mýzeı isi, kitaphana salasy, kınematografııa jáne mádenı bilim berý baǵyttaryndaǵy birlesken jobalardy damytý keleshegi talqylandy.
Elimizdiń Mádenıet jáne aqparat mınıstri búginde Mádenıet kúnderin ótkizýge daıyndyq jumystary júrip jatqanyn atap ótti.
«Atalǵan is-sharalar aıasynda Á.Qasteev atyndaǵy Ulttyq óner mýzeıiniń jaýhar týyndylaryn usynatyn kórme ótkizý, otandyq balet sheberlerin shaqyrý jáne Qazaq kınosynyń kúnderin uıymdastyrý josparlanyp otyr. Bul is-sharalar Reseıdiń jetekshi sahnalarynda – sonyń ishinde Úlken teatrda, Vahtangov teatrynda jáne ózge de bedeldi mádenıet oshaqtarynda ótkiziledi dep úmittenemiz. Bul oqıǵalar halyqtarymyz arasyndaǵy dostyq pen ózara túsinistiktiń jarqyn belgisine aınalady dep senemiz», dedi mınıstr.
Osy oraıda Reseı Mádenıet mınıstri Olga Lıýbımova ár eldiń mádenı qundylyqtary ózindik mańyzǵa ıe ekenin aıtty.
«Reseıdi jáne Qazaqstandy ortaq tarıh, dástúrler jáne jaı ǵana jyly adamı qatynastar baılanystyrady. Dál osy jaıt eki el arasyndaǵy, sonyń ishinde mádenı yntymaqtastyqtyń da odan ári damýyna qolaıly jaǵdaı jasaıdy. Bul yntymaqtastyqtyń negizinde árqashan bir-biriniń múddelerine qurmetpen qaraý jatady», dedi ol.
Jıyn barysynda eki eldiń mádenı saladaǵy ókilderi baıandama oqydy. Sondaı-aq eki el mınıstrleri túrki taıpalarynyń materıaldyq jáne rýhanı mádenıeti usynylǵan kórmeni tamashalady. Qola dáýirinen orta ǵasyrǵa deıingi kezeńdi qamtıtyn zergerlik ónerdiń ozyq úlgilerine kýá boldy.
Atalǵan mádenı is-sharalar eki el ónerpazdary qoıǵan mýzykalyq keshpen túıindeldi. «Astana Opera» sahnasynda Qazaqstan men Reseıdiń mádenıet qaıratkerleri, halyqaralyq baıqaýlardyń laýreattary, akademııalyq óner juldyzdary óner kórsetti.
