Onda saýda-ekonomıkalyq yntymaqtastyqty damytý jáne energetıka, metallýrgııa, geologııalyq barlaý, ónerkásip kooperasııasy, kólik jáne logıstıka, sıfrlyq tehnologııalar jáne basqa da salalardaǵy ózara is-qımyldy nyǵaıtý máseleleri talqylandy. Memleket basshylary deńgeıinde qol jetkizilgen ýaǵdalastyqtardy júzege asyrýǵa nazar aýdaryldy.
Qazaqstan Premer-mınıstri men Germanııa Federatıvtik Respýblıkasy Býndesratynyń prezıdenti ózara saýda kólemin arttyrý josparlaryn talqylady. Qazaqstan – Germanııanyń Ortalyq Azııadaǵy jetekshi ekonomıkalyq seriktesi. Elimizdiń úlesine GFR-dyń Ortalyq Azııa óńirimen jalpy saýdasynyń 81%-y tıesili. Byltyr Qazaqstan men Germanııa arasyndaǵy taýar aınalymy 5,9%-ǵa ósip, shamamen 4 mlrd dollarǵa jetti. Bul rette qazaqstandyq ónim eksporty 56,8%-ǵa ósip, 1,2 mlrd dollardy qurady.
Kezdesýde ınvestısııalyq áriptestikke erekshe kóńil bólindi. 2005 jyldan beri Qazaqstan ekonomıkasyna shamamen 7,2 mlrd dollar kóleminde tikeleı nemis ınvestısııalary salynǵan. Onyń ishinde 90%-dan astamy shıkizattyq emes sektorǵa tıesili. Olar – óńdeý ónerkásibi, hımııalyq ónimder, qurylys materıaldary óndirisi, kólik jáne AО́K. Birlesken ınvestısııalyq portfelde búginde jalpy somasy 54,4 mlrd dollardan asatyn 65 joba bar. Elimizde nemis kapıtalynyń qatysýymen 1 100-ge jýyq kásiporyn jumys istep tur. Jalpy somasy 1,1 mlrd dollardan asatyn 32 joba sátti aıaqtalǵan.
Qazaqstan men Germanııa arasyndaǵy ekonomıkalyq qarym-qatynasta energetıka salasy mańyzdy ról atqarady. Qazaqstan GFR-ǵa munaı jetkizý boıynsha úshinshi orynda tur. Byltyr Germanııa 10,6 mln tonna Qazaqstan munaıyn ımporttaǵan. Kelissózder barysynda qazaqstandyq munaıdy GFR-ǵa jetkizý kólemin arttyrý perspektıvalary talqylandy.
Negizgi nazar sýtegi jáne «jasyl» energetıka salasyndaǵy birlesken jobalardy júzege asyrýǵa, mıneraldy resýrstardy birlesip ıgerýdegi áriptestikke, AEA aýmaqtarynda ozyq ónerkásiptik klasterler qurýǵa jáne tereń tehnologııalyq kooperasııalar jasaqtaýǵa aýdaryldy.
«Bizdiń mindetimiz – elimizdiń berik ónerkásiptik irgesin qalyptastyrý jáne ekonomıkalyq jaǵynan óz-ózimizdi qamtamasyz etýge qol jetkizý. Biz óńdeýshi sektordy tereń óńdelgen klasterler qurý arqyly jedel damytýǵa basa nazar aýdaryp otyrmyz. Basym baǵyttarǵa metaldardy qaıta óńdeý, munaı, gaz jáne kómir hımııasy, aýyr mashına jasaý, ýrandy konversııalaý jáne baıytý, sondaı-aq avtomobılderdiń quramdas bólikteri men tyńaıtqyshtar jatady. Qazaqstan germanııalyq bıznes úshin tartymdy bolarlyq barlyq faktorlarǵa ıe. Bul degenimiz – ártaraptandyrylǵan energııa kózderi, tranzıttik jáne kóliktik áleýet, mańyzdy tabıǵı resýrstar. Investorlar úshin bizde ártúrli salyqtaı jáne kedendik jeńildikter qarastyrylǵan», dep atap ótti O.Bektenov.
О́z kezeginde Germanııa Federatıvtik Respýblıkasy Býndesratynyń Prezıdenti Anke Relınger Qazaqstanmen saýda-ekonomıkalyq baılanysty nyǵaıtýǵa múddeli ekenin bildirdi.
«Biz sizdiń elińizge Ortalyq Azııadaǵy biz úshin mańyzdy memleket retinde úlken qyzyǵýshylyqpen qaraımyz. Saıası dıalog pen mádenı-gýmanıtarlyq ózara is-qımyldyń oń dınamıkasyn saqtaǵymyz keledi. Ekonomıka salasyndaǵy yntymaqtastyqty keńeıtý – biz úshin mańyzdy. Qazaqstandy biz, eń aldymen, jaqsy seriktes retinde tanımyz», dedi Anke Relınger.
Sondaı-aq saýda-ekonomıkalyq áriptestikti arttyrýdyń negizgi faktory retinde kólik-logıstıkalyq ózara baılanysty damytýdyń mańyzy atap ótildi. Orta dáliz arqyly EO elderine, sonyń ishinde Germanııaǵa júk kólemi byltyr 4,5 mln tonnadan asqan. Qazaqstannyń logıstıkalyq áleýetin keńeıtý búginde búkil Eýropalyq Odaqtyń múddelerine sáıkes keledi.
Kezdesý qorytyndysy boıynsha taraptar barlyq perspektıvalyq baǵyt boıynsha ózara tıimdi yntymaqtastyqty nyǵaıtý nıetin jetkizdi.
