Foto: ashyq derekkóz
Bul shara – shahmat sportyn dáripteýge, úzdik jetistikterdi tanýǵa jáne bolashaq chempıondardy yntalandyrýǵa baǵyttalǵan mańyzdy joba.
Federasııa prezıdenti Tımýr Týrlovtyń aıtýynsha, 2024 jyl – qazaq shahmaty úshin tarıhı jyl boldy. Otandastarymyz halyqaralyq arenalarda joǵary nátıje kórsetip, 160 medal jeńip aldy, onyń ishinde – 55 altyn, 54 kúmis jáne 51 qola.
«Biz qazir qazaq shahmatynyń naǵyz gúldený kezeńinde ómir súrip jatyrmyz. Bul – eńbektiń, tabandylyqtyń jáne komandalyq jumystyń jemisi. KazChess Awards – bul marapat qana emes, shahmatqa degen qurmettiń, jańa chempıondarǵa degen senimniń belgisi, dedi Týrlov.
Edgar Mamedov – 14 jasynda Qazaqstan tarıhyndaǵy eń jas grossmeıster atanyp, «Úmit» medalimen marapattaldy.
Bıbisara Asaýbaeva – 2025 jylǵy Sharjah Masters sýpertýrnırinde úshinshi grossmeısterlik normatıvin oryndap, «Dara» medaline ıe boldy
«Bizdiń qurama jas, biraq óte talantty. Meniń jasym 21-de, komandanyń eń úlkenimin. Bul – bolashaǵy zor shahmatshylardyń býyny», dedi Bıbisara Asaýbaeva marapattaý rásiminde.
Saltanatty sharamen qatar, 28 mamyrda Astanadaǵy Halyqaralyq qarjy ortalyǵynda Qazaqstan shahmat federasııasynyń sezi ótti. Oǵan elimizdiń barlyq óńirinen 50-den astam delegat qatysty. Sezd barysynda federasııanyń jarǵysyna ózgerister engizilip, 2024 jyldyń qorytyndylary men aldaǵy damý baǵyttary talqylandy.
Araılym MYRZAHAN,
EUÝ 2 kýrs stýdenti
