«Tańerteń edi, men uıyqtap jatqanmyn. Kenetten selektordan bosanaıyn dep jatqan áıelge kómek qajettigin habarlady. Men basqa vagonda bolatynmyn, habarlandyrýdy estip, áıel jatqan vagonǵa júgirdim», deıdi Ulytaý oblystyq densaýlyq saqtaý basqarmasy Oblystyq jedel medısınalyq járdem stansııasynyń Sátbaev qalasy boıynsha bólimshesiniń feldsheri Aıdana Smaıylova.
Feldsher Aıdananyń kásibı jáne jedel áreketteriniń arqasynda áıel balany tabıǵı jolmen, asqynýsyz jáne patologııasyz dúnıege ákeldi. Talaptarǵa sáıkes jedel medısınalyq járdem karetasy shaqyrtylyp, «Jeńis» stansııasynan áıel men sábı Jáırem kenti aýrýhanasyna jetkizildi. Sondaı-aq, bosaný kezinde Sátbaev qalasyndaǵy «Baldyrǵan» balabaqshasynyń meıirgeri Qarlyǵash Álıeva men «Qazaqmys» korporasııasy» JShS ınjener-ekology Jaqypbek Zarına barynsha kómek kórsetken.
Qazirgi ýaqytta anasy men Asylym esimdi náresteniń jaǵdaılary jaqsy jáne ózderiniń qutqarýshylaryna alǵys aıtty.
Aıdana Smaıylova Jezqazǵan qalasynyń joǵary oblystyq medısınalyq kolledjiniń túlegi. 2018 jyldan bastap oblystyq jedel medısınalyq járdem stansııasynda eńbek etedi, erekshe balanyń anasy. Ol mundaı jaǵdaıǵa birinshi ret tap bolǵan emes, kásibı mindetin oryndaý babynda birneshe ret áıelderdi bosandyryp alǵan.
Ulytaý oblysy
