Qalamger týǵan óńirdegi Qabanbaı aýylyna arnaıy at basyn burǵan oblys ákimi Beıbit Isabaev, Májilis depýtaty Erlan Saırov, Memlekettik syılyqtyń laýreaty, aqyn Ulyqbek Esdáýlet, ǵalymdar, qalamgerler, jalpy aýdan jurtshylyǵy Ánýar Álimjanovtyń rýhyna taǵzym jasady. Berekeli aýyldyń ortalyǵynda ornalasqan qalamger atyndaǵy saıabaqtaǵy bıýstine gúl shoqtaryn qoıdy. Budan ári shara Qabanbaı aýyldyq Mádenıet úıinde «Álemge áıgili Ánýar» atty ǵylymı-tanymdyq konferensııamen jalǵasty.
Mádenıet úıiniń foıesinde mýzeı eksponattarynan, kitaptardan kórme uıymdastyrylyp, Á.Álimjanovqa arnalǵan beınefılm kórsetildi. Konferensııany ashqan oblys ákimi Beıbit Isabaev Jetisý jerine qadam basqan kópshilikke «Qosh keldińizder» deı otyryp, aldymen Memleket basshysy Qasym-Jomart Toqaevtyń Quttyqtaý hatyn oqyp berdi.
Mereıtoıǵa joldanǵan Prezıdenttiń osy Quttyqtaý haty men Parlament Májilisi tóraǵasynyń quttyqtaýy aýyldaǵy Qabanbaı atyndaǵy tarıhı-ólketaný mýzeıiniń qoryna tapsyryldy. Konferensııa barysynda Ánýar Álimjanovtyń eldik múdde jolyndaǵy qarymdy qaıratkerligi, jazýshylyq qyry, tulǵalardy tanytýdaǵy eren eńbegi keńinen baıandaldy.
«Jazýshylardyń bári de eńbektenedi, biraq kóptiń ishinen oza shaýyp, halyqtyń kóńilinde, tarıhtyń jadynda qalatyn qaıratkerler kóp emes. Ánýar Turlybekuly sondaı aıtýly azamattardyń qatarynda. Ol – Ábý-Nasyr ál-Farabıdi ortamyzǵa alyp kelgen tulǵalardyń biri. Ol kezde ǵylymı, ádebı orta Aqjan ál-Mashanı arqyly ál-Farabıdi tanyǵanymen, jalpy qoǵam tolyq bile qoımaǵan edi. Ánýar Álimjanov onyń tegi qypshaq ekenin, Otyrar qalasynan shyqqanyn dáleldep, ómir jolyn baıandaıtyn «Otyrardan jetken syı», «Ustazdyń oralýy» sııaqty shyǵarmalaryn jazdy. Almatydaǵy dańǵylǵa ál-Farabı esimi berilýin kóterip, oǵan kóp eńbek sińirgenin búgingi urpaqtyń bilip júrgeni jón», degen Halyqaralyq «Alash» ádebı syılyǵynyń laýreaty, jazýshy Nurdáýlet Aqysh aıaýly aǵamyzdyń ózge de qyrlaryna keńinen toqtaldy.
Osy taqilettes estelikter men jazýshy turǵysyndaǵy sony pikirler aıtylǵan konferensııada fılologııa ǵylymdarynyń doktory, professor, ánýartanýshy Káken Hamzın: «Biz Ánýar Álimjanovty jekeshelendire almaımyz, ol búkil qazaqqa ortaq perzent, tipti halyqaralyq keńistikke aty ketken asa kórnekti qaıratker. Keleshekte budan da salmaqty halyqaralyq deńgeıdegi is-shara óterine kámil senemin», dedi.
О́z kezeginde aqyn Ulyqbek Esdáýlet jazýshynyń halyqaralyq ádebı baılanystardy nyǵaıtýdaǵy róline toqtaldy: Zańǵar jazýshy Muhtar Áýezovtiń: «Birinshi Petr Eýropaǵa tereze tesken bolsa, Ánýar Álimjanov Azııaǵa aıqara jol ashty», – deıtin sózi bar. Rasynda Álimjanov KSRO-nyń Azııa, Afrıka jazýshylarymen baılanys jónindegi komıteti tóraǵasynyń orynbasary, dál osyndaı Eýropa jazýshylarymen baılanys jónindegi komıssııanyń belsendi múshesi boldy. Bul álem ádebıetimen tikeleı baılanys jasap otyrǵan qazaqtyń ókili degen sóz», dedi U.Esdáýlet.
Konferensııa barysynda belgili qalamger, Almaty oblysynyń qurmetti azamaty Álı Ysqabaı jazýshy týraly tolǵamyn jetkizse, halyqaralyq «Alash» ádebı syılyǵynyń laýreaty Qýat Qaıranbaev jazýshy rýhyna arnalǵan jyryn oqydy.
«Ánýar aǵamyzdyń rýhanı bolmysyna boıladyq, asqaq turpatyn kózge elestettik. Endi osy mereıtoı ústinde Sáken aǵamyzdyń Ánýar Álimjanov qaıtys bolǵanda jazǵan óleńin oqyp berýdi jón sanadym», dep qos tulǵany teń kótere tolǵanǵan «Qurmet» ordeniniń ıegeri, aqyn Jumataı Ospanuly jyrǵa kezek berdi. «Aǵam bar edi mir tildi, Jaǵam bar edi – jyrtyldy! Qan jylap turǵan júrekpen, Jubatam qalaı jurtymdy?», – dep keletin Sáken Imanasov jyrymen túıindelgen konferensııadan soń kópshilik jazýshynyń rýhyna arnalǵan asqa qatysty.
Jetisý oblysy
