Ol kúni metropolıten ashylǵan sátten stansalar jabylǵanǵa deıin tegin jol júrýge bolady. Sonymen qatar qalanyń jas turǵyndary men qonaqtary úshin konsertter, festıvaldar, tanymdyq jáne mádenı-demalys baǵdarlamalary, ınteraktıvti alańdar, shyǵarmashylyq sheberlik synyptary men qaıyrymdylyq aksııalaryn qamtıtyn aýqymdy merekelik is-sharalar ótedi.
Basty oqıǵa «BALAFEST, JARYQ SKILL FEST» qalalyq balalar festıvali bolmaq. Jas urpaqtyń shyǵarmashylyq, ıntellektýaldyq jáne tulǵalyq áleýetin damytýǵa baǵyttalǵan is-shara Álııa Moldaǵulova men Mánshúk Mámetova atyndaǵy skverde saǵat 12:00-den 16:00-ge deıin ótedi. Festıval myńnan astam qatysýshyny, onyń ishinde 300 myńnan astam oqýshy qatysqan «BALAFEST» baıqaýynyń jeńimpazdaryn biriktiredi. Festıvaldiń tujyrymdamasy – fýtýrıstik «bolashaq qalasy», onda balalar ekologııaǵa, mádenıetke, dástúrlerge, tehnologııalarǵa jáne kásipterge arnalǵan taqyryptyq aımaqtarǵa bara alady. Qatysýshylardy sheberlik- synyptary, kvestter, ınteraktıvti sabaqtar, sondaı-aq syılyqtarǵa aıyrbastaýǵa bolatyn oıyn valıýtasy kútedi.
Sonymen qatar, 1 maýsymda Gorkıı atyndaǵy Ortalyq mádenıet jáne demalys saıabaǵynda «Bala Star Almaty» otbasylyq festıval-konserti ótedi. Konserttik baǵdarlama saǵat 11:00-de bastalady. Oǵan qazaqstandyq estrada juldyzdary - Roza Rymbaeva, Jarqynaı Hanaıym, Aıgúl Qosanova, Dınaıa, sondaı-aq jas oryndaýshylar men shyǵarmashylyq ujymdar: Alsý Ýlhanova, Sherhan Arystan, Naǵashybaı Mıras, «Sarmat», «Gúlstan» ansamblderi jáne «Boztorǵaı» vokaldyq stýdııasy qatysady. Kelýshilerge qalanyń horeografııalyq stýdııalarynan 200-den astam balanyń qatysýymen «Almaty júregimde» merekelik fleshmoby usynylady. Merekelik atmosferany qoldanbaly óner, otbasylyq karaoke jáne basqa da oıyn-saýyqtar boıynsha sheberlik synyptary bar ınteraktıvti aımaqtar jasaıdy. Qýyrshaq teatrynyń artısteri usynatyn baǵdarlama balalardyń erekshe qyzyǵýshylyǵyn týdyrady.
Almaty Gallery kishi zalynda 1 maýsymda saǵat 12:00-de jas sýretshi Raýana Oljastyń «Meniń balalyq shaǵymnyń palıtrasy» atty jeke kórmesi ashylady. Ekspozısııada halyqaralyq baıqaýlarǵa qatysýshy jasaǵan jarqyn peızajdar, natıýrmorttar men sıýjettik kompozısııalar usynylady. Kórme 15 maýsymǵa deıin ashyq bolady.
Bastaýysh synyp oqýshylaryna arnalǵan tanymdyq is-shara Almaty qalasynyń tarıhy murajaıynda ótedi. Kúni boıy munda «Jas arheolog» oıyny uıymdastyrylady, onyń barysynda balalar arheologııa negizderimen tanysady, arheologııalyq qazba prosesin kóredi jáne ejelgi artefaktilerdiń kóshirmelerimen jumys isteıdi. Baǵdarlamany murajaıdyń aǵa ǵylymı qyzmetkeri M. M. Nurpeıisov júrgizedi.
Arnaıy merekelik baǵdarlama qalalyq kitaphanalarda da ótedi. 1 maýsym kúni saǵat 10:00-den bastap Mahatma Gandı atyndaǵy saıabaqta №4 kitaphananyń qatysýymen «Almaty – baqytty balalar qalasy» atty aýqymdy mereke bastalady. Balalardy shyǵarmashylyq sheberhanalar, kórmeler, jazýshylarmen kezdesýler jáne býkkrossıng kútedi. I. A. Krylov atyndaǵy balalar kitaphanasynda teatrlandyrylǵan qoıylymdar, konsert, kóńildi kvestter jáne balalar jazýshysy Maǵıra Qojahmetovamen shyǵarmashylyq kezdesý ótedi. Jambyl atyndaǵy jasóspirimder kitaphanasynda № 92 mamandandyrylǵan lıseıdiń oqýshylary ádebı oqýlarǵa, baıqaýlarǵa jáne kórkemdik is-sharalarǵa qatysady. 2 maýsymda S. Begalın atyndaǵy Ortalyq qalalyq balalar kitaphanasynda teatrlandyrylǵan qoıylymmen, sheberlik synyptarymen, fleshmobpen jáne haıýanattar baǵymen baılanystyratyn «Kitap jazy» merekesi ótedi.
1 maýsymda Almaty haıýanattar baǵynyń bazasynda jazǵy zoobaq - 9 jastan 16 jasqa deıingi oqýshylarǵa arnalǵan bilim berý jobasy jumys isteı bastaıdy. Baǵdarlama ekologııalyq mádenıetti damytýǵa, zoologııaǵa, bıologııaǵa jáne qorshaǵan ortany qorǵaýǵa qyzyǵýshylyqty qalyptastyrýǵa baǵyttalǵan. Jaz boıy qatysýshylar teorııalyq jáne praktıkalyq sabaqtarǵa qatysady, haıýanattar baǵy qyzmetkerleriniń kúndelikti jumysymen tanysady, janýarlardy baqylaıdy jáne olarǵa kútim jasaý negizderin meńgeredi. Sabaqtar tegin negizde ótedi jáne ony haıýanattar baǵynyń mamandary - zoologtar, veterınarlar men pedagogtar júrgizedi. Kýrstarǵa taqyryptyq dárister, ekskýrsııalar, sheberhanalar jáne ınteraktıvti sabaqtar kiredi. Qatysý úshin «Men nelikten haıýanattar baǵynda oqyǵym keledi?» taqyrybynda esse jazý qajet boldy.
Sondaı-aq, mereke aıasynda 30 mamyrda saǵat 12:00-de Qazaq memlekettik sırkinde «PRO Sırk» qaıyrymdylyq shoýy ótedi. Qoıylymǵa az qamtylǵan jáne kópbalaly otbasylardan shyqqan balalar, erekshe qajettilikteri bar balalar jáne halyqtyń mobıldiligi tómen toptarynyń ókilderi shaqyryldy. 1700 - den astam kórermen sırktiń úzdik ártisteriniń, sonyń ishinde áýe akrobattarynyń, ıllıýzıonısterdiń jáne juldyzdy qonaq Dana Zapashnyı jáne onyń Bonıa esimdi úıretilgenshımpanzesiniń qatysýymen jarqyn baǵdarlamany tegin tamashalaı alady.
Almatyda Halyqaralyq balalardy qorǵaý kúni jylýlyq, qamqorlyq pen shyǵarmashylyq shabytqa toly naǵyz jarqyn mereke bolmaq. Barlyq atalǵan is-sharalar balalar úshin tegin ótedi.
Almaly aýdanynda saǵat 12:00-de Gandı saıabaǵynda oıyndar, baıqaýlar uıymdastyrylyp, taqyryptyq balalar is-sharasy ótedi. Anımatorlar tanymal balalar mýltfılmderine negizdelgen oıyndardy kórsetedi. \Mereke kúni saıabaq qonaqtary oıyn-saýyq shoý-baǵdarlamasy men Murat Mýtýrganovtyń sırk qoıylymyn tamashalaıtyn bolady.
Alataý aýdanynda saǵat 11:00-de Zerdeli skverinde (Zerdeli shaǵyn aýdany, 180a) balalarǵa arnalǵan merekelik is-shara: konsert, sırk shoýy jáne anımatorlardyń qatysýymen túrli ınteraktıvti is-sharalar ótedi.
Áýezov aýdanynda saǵat 18:00-de Family park-ta ashyq aspan astyndaǵy mýltfılmniń merekelik kórsetilimi bolady.
Bostandyq aýdanynda merekelik is-sharalar (konserttik baǵdarlama, balalar jarysy, sheberlik synyptary) Tuńǵysh Prezıdent saıabaǵynda saǵat 10:00-den bastap ótedi.
Jetisý aýdanynda saǵat 10:00-de Qulager shaǵyn aýdanynda konserttik baǵdarlama uıymdastyrylady jáne anımatorlardyń qatysýymen «Jetisu Fest» festıvali ótedi.
Túrksib aýdanyndaǵy mereke 10:00-de Seıfýllın dańǵyly, 13/1 mekenjaıdaǵy №6 Oqýshylar úıiniń aldynda ótedi.
Medeý aýdanynda saǵat 11:00-de Ortalyq mádenıet jáne demalys saıabaǵynda balalardy konserttik baǵdarlama kútedi.
Naýryzbaı aýdanynda saǵat 18:00-de ákimdik janyndaǵy amfıteatrda balalarǵa arnalǵan oıyn-saýyq baǵdarlamasy bar «Ashyq aspan astyndaǵy kıno keshi» ótedi.
ALMATY
