Foto:Tolǵanaı Batyrhan
2016 jyldan dástúrli túrde ótkiziletin sharada zańgerler, belgili advokattar, notarıýstar, sot oryndaýshylary, sondaı-aq prokýratýra, quqyq qorǵaý organdary, jergilikti atqarýshy organdar, memlekettik qurylymdardyń ókilderi syndy 100-den asa maman qatysyp, turǵyndarǵa tegin keńes berdi.
El boıynsha ótken aksııany uıymdastyrýǵa Sybaılas jemqorlyqqa qarsy is-qımyl Agenttigi uıytqy bolǵan. Aýqymdy sharaǵa kelgen 700-ge jýyq astanalyqqa agenttiktiń volonterlik uıymy da qyzmet kórsetti. Kelýshiler jetekshi mamandardan quqyqtyq keńes alyp, kókeıindegi saýaldardyń sheshimin taýyp jatty.
«Halyq zańgeri» halyqty quqyqtyq qoldaýdyń suranysqa ıe tuǵyrnamasyna aınaldy. 2016 jyldan beri 150 myńnan astam azamat tegin kómek aldy, al konsýltasııalar ótkizýge 7 myńnan astam bilikti zańgerler men memlekettik organdardyń basshylary tartyldy. Osy aksııaǵa turǵyndar tarapynan suranys jyl sanap artyp keledi. Barshamyzǵa belgili zańgerlerdiń keńesine keı turǵyndar qarjy taba almaı jatady. Bul aksııa sondaı azamattarǵa taptyrmas múmkindik. Olar suraǵyna baılanysty qaıda júginý kerek, máseleni sheshýdiń baǵyt-baǵdaryn alyp ketedi», dedi QR SJQIA Astana qalasy departamentiniń Prevensııa basqarmasy basshysynyń orynbasary Dıas Qozybaev.
Aksııa aıasy azamattyq quqyq jáne prosess, banktik quqyq, atqarýshylyq is júrgizý, neke-otbasy quqyǵy, muragerlik, turǵyn úı, jer, eńbek, salyq, áleýmettik qamsyzdandyrý jáne notarıattyq qyzmet, zııatkerlik menshik, korporatıvtik ákimshilik quqyq, qylmystyq quqyq jáne prosess baǵyttaryn qamtydy. 9-dan asa zań salasynda tolysqan tájirıbege ıe jeke zańger bul aksııada turǵyn úı máselesine qatysty túıinderdi tarqatýǵa atsalysty.
«OSI qurý, turǵyn úı kompanııalary men páterlerge kommýnaldyq qyzmet kórsetýshilerge qatysty saýaldar kelip tústi. Kelýshilerge zańǵa saı keńes berip jatyrmyz. Mundaı sharalardy ótkizýdiń tıimdi tusy kóp. Sebebi turǵyndar bir jerden máselesine qatysy bar birneshe mamannan keńes alyp úlgeredi», dedi zańger Baýyrjan Aıymbetov.
Aıta keteıik, «Halyq zańgeri» respýblıkalyq áleýmettik aksııasy el aýmaǵyn túgel qamtydy.
