Jańa nysannyń ashylý saltanatynda oblys ákimi Nuralhan Kósherov qala turǵyndary men qonaqtaryna jaıly orta qalyptastyrý basty maqsattardyń biri ekenin atap ótti. «Memleket basshysy Qasym-Jomart Kemeluly «Elimizdi kógaldandyrý, abattandyrý – úlken memlekettik mańyzy bar is. Bul – jalpyulttyq másele. Qazaqstanymyz taza bolýy qajet» dep aıtqan bolatyn. Jobany iske asyrýǵa atsalysqan barlyq mamandarǵa, qurylysshylarǵa alǵysymdy bildiremin. О́ńirde jyl sanap týrıster sany ósip keledi. Demalys oryndary da ashylýda. Osylardyń barlyǵy Túrki áleminiń ortalyǵy Túrkistan qalasynyń damýyna oń serpin beredi», dedi Nuralhan Kósherov.
«Jańa qala» aýmaǵynda 12,77 gektar jerde ornalasqan saıabaqta 38 438 sharshy metr jer kógaldandyrylyp, 8 myńǵa jýyq tal men jasyl ekpe egilgen. Jasandy kól 19500 sharshy metr aýmaqty qamtıdy. Sý syıymdylyǵy – 60 000 tekshe metr. Kól ústinen uzyndyǵy 92 metr jaıaý júrginshiler kópiri salynǵan. Sonymen qatar kól ústinde sholý alańy, sarqyrama, sýburqaqtar bar. Demalys aımaǵynda tamaqtanatyn oryndar, balalar alańshalary, ákimshilik ǵımaraty qarastyrylǵan. Odan bólek, shatyrlar, jaryqshamdar, 270 dana oryndyq pen 240 dana qoqys jáshigi ornatylǵan saıabaq bir kúnde 600 adamǵa deıin qabyldaı alady. Munda turǵyndar men qala qonaqtarynyń jaıly demalysy úshin barlyq jaǵdaı qarastyrylǵan.
TÚRKISTAN
