Qazaqstan Respýblıkasy Prezıdentiniń rezıdensııasyna oqý úzdikteri, pán olımpıadalarynyń, respýblıkalyq jáne halyqaralyq baıqaýlardyń jeńimpazdary, sport saıystarynyń júldegerleri, batyl áreketimen kózge túsken balalar keldi. Aqordanyń kishkentaı qonaqtarynyń qatarynda kópbalaly otbasylardan shyqqan, ata-anasynyń qamqorlyǵynsyz qalǵan jáne erekshe qajettiligi bar jetkinshekter de boldy.
Ekskýrsııa kezinde oqýshylar Aqordanyń ortalyq saltanatty holy men resmı qabyldaýlar ótkizýge arnalǵan zaldardy, Memleket basshysynyń kitaphanasyn, sondaı-aq rezıdensııa aýmaǵyndaǵy baqty aralady.
Ekskýrsovodtar ǵımarat qurylysynyń tarıhy, onyń erekshelikteri men munda ótetin is-sharalarǵa baılanysty qyzyqty faktiler jaıynda málimet berdi.
Sonymen qatar oqýshylarǵa Prezıdent atynan estelik syılyqtar tabystaldy.
О́ńirlerden kelgen balalar elordanyń kórikti oryndaryn da aralaıdy.
Bıyl Halyqaralyq balalardy qorǵaý kúnine arnalǵan is-sharalar algorıtmi «Qazaqstan balalary» biryńǵaı tujyrymdamasyna saı túzildi. 22 mamyrdan bastalyp 1 maýsymǵa deıin jalǵasatyn onkúndik aıasynda otbasy, qaýipsizdik, densaýlyq, bilim berý, bala quqyǵyn qorǵaý sekildi mańyzdy máselelerge basa nazar aýdaryldy.
El aýmaǵynda otbasylyq, aǵartýshylyq, qaıyrymdylyq baǵyttaryndaǵy rásimder, kórmeler, sporttyq týrnırler, ekologııalyq aksııalar, dárigerler men psıhologtardyń qabyldaýlary uıymdastyryldy. Dekadanyń bir kúni sıfrlyq tehnologııalardy ilgeriletýge jáne sıfrlyq ortada balalardy qorǵaýǵa arnaldy.
