Maradona FIFA prezıdenttigine kandıdatýrasyn usynady

ASTANA. 22 maýsym. Argentınanyń ataqty fýtbolshysy Dıego Maradona FIFA prezıdenttiginen úmitti. Bul týraly Telesur telearnasynyń jýrnalısi Vıktor Ýgo Moralestiń twitter-degi jazbasyna silteme jasaǵan RIA «Novostı» habarlady. Morales áleýmettik jelidegi paraqshasyna: «Maradona FIFA prezıdenttigine óz kandıdatýrasyn usynýǵa nıetti. Onyń ataq-abyroıy óte joǵary», – dep jazǵan. Aıta keteıik, atalǵan fýtbol qaýymdastyǵynyń sońǵy prezıdent saılaýy 29 mamyrda ótken bolatyn. Ol kezde FIFA-ny 1998 jyldan beri basqaryp kele jatqan Iozef Blatter besinshi merzimge qaıta saılandy. Alaıda, 2 maýsymda ol óz erkimen otstavkaǵa ketti. Blatter qaýymdastyqtyń kezekten tys kongresin ótkizip, taǵy da prezıdent saılaýyn ótkizýdi usyndy. Soǵan sáıkes, kezekten tys kongress osy jyldyń jeltoqsan aıy men 2016 jyldyń aqpany aralyǵynda ótetin bolyp sheshildi. Al prezıdent saılaýy ótetin merzim 20 shildede belgili bolady. Maradonaǵa deıin de birneshe fýtbol mamany prezıdenttikten úmitti ekenderin málimdegen edi. Olardyń arasynda Fransııanyń belgili fýtbolshysy Davıd Jınola, Iordanııa hanzadasy Álı bın-Ál-Hýseın, FIFA-nyń burynǵy vıse-prezıdenti jáne Ońtústik Koreıa fýtbol qaýymdastyǵynyń burynǵy basshysy Chon Mon Djýn, Brazılııanyń dańqty fýtbolshysy Zıko, sondaı-aq, Lıberııa fýtbol qaýymdastyǵynyń prezıdenti Mýsa Bılıtı bar. Elaman Qońyr. Derek, sýret: RIA «Novostı».