ASTANA. 22 maýsym. «Áleýmettik jobalar» korporatıvtik qory qamqorlar keńesiniń sheshimimen «Barys» hokkeı komandasynyń bas jattyqtyrýshysy bolyp Erlan Saǵymbaev taǵaıyndaldy. Atalǵan keńestiń tóraǵasy Asqar Mamın jańa jattyqtyrýshynyń aldaǵy jumysyna sáttilik tiledi. Bul týraly «Barys» komandasynyń baspasóz qyzmetine silteme jasaǵan egemen.kz habarlady.
Erlan Erlesuly 1970 jyly 5 sáýirde qazaq hokkeıiniń ustahanasy – О́skemen qalasynda týǵan. Jergilikti «Torpedo» komandasynyń túlegi. Odan bólek, «Avtomobılıst» (Qaraǵandy), «Avangard» (Omby), «Metallýrg» (Novokýznesk) jáne «Sıbır» (Novosıbırsk) hokkeı komandalarynda ter tókti. Sondaı-aq, 1998 jyly Naganoda (Japonııa) ótken qysqy Olımpıadada Qazaqstan quramasynyń kapıtany boldy. Ulttyq qurama sapynda eki dúrkin qysqy Azııa oıyndarynyń jeńimpazy atandy (1996 jáne 1999 jj.).
Oıynshy retinde sporttyq mansabyn 2001 jyly aıaqtaǵan E.Saǵymbaev sodan beri shákirt tárbıeleýmen aınalysyp keledi. Osy aralyqta «Kazsınk-Torpedo» (О́skemen), «Saryarqa» (Qaraǵandy), «Ertis» (Pavlodar) komandalaryn jáne ulttyq quramany jattyqtyrdy. Odan bólek, «Snejnye barsy» jáne «Barys» komandalary jattyqtyrýshylar quramynyń múshesi boldy. Shaıbaly hokkeıden halyqaralyq dárejedegi sport sheberi. Qazaqstannyń eńbek sińirgen jattyqtyrýshysy.
Aıta keteıik, «Barystyń» burynǵy bas jattyqtyrýshysy Andreı Nazarov Sankt-Peterbýrgtiń SKA komandasyna ketip qalǵan bolatyn.
Elaman Qońyr.
Derek, sýret: «Barys» hokkeı komandasynyń baspasóz qyzmeti.
