Atalǵan jarysta jeńis tuǵyryna kóterilgender arasynda asqan sheberlik tanytqan ákki balýandar az bolǵan joq. Ásirese, Qyzylorda men Qostanaıdan kelgen jigitterge dán rıza boldyq. Alǵashqy kúni bul komandalardyń árqaısy eki altynnan oljalady. Atap aıtsaq, 60 kg salmaq dárejesinde Aıdos Sultanǵanlıǵa teń keler eshkim tabylmady. Álem chempıonatynda eki márte qola medaldi oljalaǵan oǵylan fınalda da óziniń myqtylyǵyn moıyndatty. Sheshýshi tusta Syr boıynyń sańlaǵy kánigi qarsylasy jetisýlyq Ǵalym Qabdýnasarovty qos jaýyrynymen jerge qadady. Aıdostyń komandalyq áriptesi Alpamys Dastanbek 55 kg salmaqta top jardy. Fınalda ol astanalyq Marlan Muqashevpen teń tústi. Ereje boıynsha ondaı jaǵdaıda sońǵy ádisti kim jasady jeńis soǵan beriledi. Bul rette Alpamystyń asyǵy alshysynan tústi.
Qostanaı oblysy ókilderi arasynan Iýsýp Masıev (97 kg) pen Mansýr Shadýkaevtyń (130 kg) mereıi ústem boldy. Nebir myqtylardy jolynan yǵystyrǵan Masıev aqtyq synda shyǵysqazaqstandyq Salavat Ahmetqalıdi jeńdi. Bastapqy básekelerdiń birinde Azııa chempıony Álimhan Syzdyqovqa san soqtyrǵannan keıin-aq Shadýkaevtyń endi shashasyna shań juqtyrmaıtyna senimdi boldyq. Ishki túısigimiz aldamaǵan eken. Fınalda Mansur Almaty oblysynyń sportshysy Aqarys Berdashrovtan basym tústi. Taǵy bir altyndy astanalyq Mereı Maýletqanov (72 kg) oljalady. Bas júlde úshin tartysta ol Soltústik óńirden kelgen Danııar Qalenovty qapy qaldyrdy.
Kelesi kúni 63 kg salmaqta almatylyq Erkebulan Ardaqovtyń aıy ońynan týdy. Fınalda ol jarys qojaıyny Asaýhat Muhamadıevtiń óreskel qateligin utymdy paıdalandy. «Qazaqstan» sport keshenine jınalǵan jankúıerler 67 kg salmaq dárejesindegi tartysty taǵatsyzdana kútti. Sebebi, bozkilemge shyqqan balýandar azýly edi. 24 jastaǵy Erjet Jarylqasyn – 2024 jylǵy álem chempıonatynyń kúmis júldegeri, onyń qurdasy Sultan Ásetuly – 2023 jylǵy jastar arasyndaǵy (U-23) álem birinshiliginiń jeńimpazy. Ekeýiniń de Azııa chempıony degen dardaı ataqtary bar. Biraq Jambyl oblysynyń ókilderi bir-birmen arpalysýdy jón kórmedi de, álde Jarylqasynnyń jaraqaty boldy ma, áıetýir jeńis Ásetulyna berildi. Kóne Tarazdan kelgen taǵy bir balýan Talas Áshirhanov 77 kg salmaqta aldyna jan salmady. Jas sportshynyń kúresi tásili men máneri jáne de jeńiske degen qushtarlyǵy óte jaqsy áser qaldyrdy. 82 kg salmaqta Almır Tólebaev top jardy. Fınalda Almaty oblysynyń apaıtósi tájirıbeli Qaharman Qısmetovti qapy qaldyrdy. 72 kg salmaqta Mereı Máýletqanovqa eshkim qarsylyq kórsete alǵan joq.
87 kg salmaqtyń fınaldyq saıysynda astanalyq Maqsat Saılaý men soltústikqazaqstandyq Islam Evloev kúsh synasty. Osydan eki aıǵa jýyq ýaqyt buryn 23 jasqa deıingi balýandar arasyndaǵy el birinshiliginiń bas júldesi úshin tartysta dál sol sportshydan Maqsattyń mysy basym boldy. Bul joly ekeýi de aıanǵan joq. Báseke barysynda kesek ádisterdiń san-alýan túrin kórdik. Tarazy basy uzaq ýaqyt teńselip turdy. Birde Saılaý, birde Evoloev alǵa shyqty. Eń ókinishtisi, syn saǵatta bozkilem ıesiniń eske jaraqaty syr berdi. Sonyń saldarynan ol jeńisti ýysynan shyǵaryp aldy. San syi kórermenge keremet emosııa syılaǵan jan alysyp, jan berisken aıaqtalýyna 10 sekýnd qalǵanda Islam qarsylasyn keýdesinen asa laqtyryp, aıqyn jeńiske qol jetkizdi. Sóıtip, Qaraǵandyda jibergen esesin qaıtarǵan Evloev el kýbogyn ıelendi. Maqsat kúmis medaldi qanaǵat tutty.
