Merekelik sharanyń basty bólimi Ile aýdanynyń О́tegen batyr kenti men Qonaev qalasynyń 5-jaǵajaıynda uıymdastyryldy. Tańǵy saǵat 9:00-de О́tegen batyr aýylynda Memlekettik Tý tuǵyry mańyna jınalǵan kópshilik Ánurandy birge shyrqap, kók baıraqtyń kókke kóterilý sátine kýá boldy.
Almaty oblysynyń ákimi Marat Sultanǵazıev jınalǵan jurtshylyqty quttyqtap, Memlekettik rámizderdiń el bolashaǵyn tárbıeleýdegi mańyzyn atap ótti.
«Tý kóterý – tek saltanatty rásim ǵana emes, bul – urpaqqa patrıottyq tárbıe berýdiń, ulttyq rýhty jańǵyrtýdyń naqty kórinisi. Memlekettik rámizder – ár azamattyń júregindegi otansúıgishtik sezimin oıatatyn kıeli nyshan», dedi óńir basshysy.
Sondaı-aq ol, Memleket basshysy Qasym-Jomart Toqaevtyń «Memlekettik rámizderimiz – kúlli halqymyzǵa qasterli nyshandar» degen sózine toqtalyp, táýelsizdiktiń qundylyǵyna erekshe mán berdi.
Shara aıasynda konserttik baǵdarlama usynylyp, patrıottyq ánder shyrqaldy.
Merekeniń ekinshi kezeńi Qonaev qalasyndaǵy 5-jaǵajaıda jalǵasty. Qala kóshelerimen ótken «Tulpar» retro kólikter sherýi merekege kórik berip, jaǵajaı alańyna tizilip qoıyldy. Qala ákiminiń quttyqtaýynan soń, konserttik baǵdarlama usynyldy.
Kópshiliktiń erekshe yqylasyna bólengen sát — kásibı flaıbordshy Olesıa Kolesnıchenkonyń sý ústindegi kórinisi boldy. Ol katerler men jelkendi qaıyqtardyń arasynda áýege kóterilip, akrobatıkalyq óner kórsetti.
«Tuǵyrly Týym» aksııasy — halyqtyń patrıottyq rýhyn kóterip, memlekettik nyshandarǵa degen qurmetti arttyrýǵa baǵyttalǵan taǵylymdy bastama. Bul kún — jas urpaqqa eldik pen birlik týraly oı salyp, el rámizderiniń qadirin tereń uǵynýǵa múmkindik berdi.
«Bir mezette kókke kóterilgen Tý – elimizdiń tutastyǵy men halqymyzdyń júregindegi ortaq maqtanyshtyń belgisi», deıdi uıymdastyrýshylar.
Elimizdiń táýelsizdigin álemge áıgileıtin Memlekettik rámizder kúnine oraı, «AMANAT» partııasynyń Almaty oblystyq fılıalynyń qoldaýymen birqatar is-shara júzege asty.
Atap aıtsaq, Qonaev qalasyndaǵy Asp Club drıft alańynda, Qapshaǵaı sý qoımasynyń jaǵalaýynda Memlekettik rámizder kúnine arnalǵan erekshe avtoaksııa ótti. Ár kóliktiń tóbesine Qazaqstannyń kók Týy ornatylyp, 16 avtokólik birlesip «KZ» jazýyn qurady.
Máre aldynda júrgizýshiler shekteýli alańda sınhrondy drıft jasap, kólikterdiń qozǵalysyn dál úılestire bildi. Osylaısha qatysýshylar memlekettik rámizderge degen qurmetterin avtosport arqyly bildirdi.
Memlekettik rámizder kúnine oraı Eńbekshiqazaq aýdanyndaǵy Esik kóli jaǵasynda 30-dan astam bala Ánurandy ulttyq aspaptarda oryndady. Teńiz deńgeıinen 1759 metr bıiktikte ótken bul kórinis – tabıǵat pen el rýhynyń úılesimin pash etti.
Sonymen qatar, Memlekettik tý Almaty oblysynyń kórikti jerlerinde jelbiredi. Ataqty Qapshaǵaı jaǵalaýy, Sharyn shatqaly, Kólsaı men Kóshpendiler qalashyǵynda jelbiregen kók Týymyz kóz súısintti.
Almaty oblysy
