Bul qoldaý eldi ekologııalyq jańǵyrtýǵa eleýli úles qosyp, jasyl ekonomıka salasyndaǵy óńirlik kóshbasshy retindegi ustanymymyzdy nyǵaıtady. Jasyl jobalardy ilgeriletý maqsatynda byltyr BUU qory úshin arnaıy eldik baǵdarlama daıyndaldy. «Halyqaralyq uıymdardyń qoldaýymen Qazaqstanǵa osy Qor tarapynan shamamen 280 mln AQSh dollaryna qarjylandyrý qarastyrylǵan. Atalǵan qarajat jańartylatyn energııa kózderin damytýǵa, ónerkásip sektorynda tómen kómirtekti tehnologııalardy engizýdi yntalandyrýǵa, sondaı-aq elektromobılderdi damytýdy qoldaýǵa baǵyttaldy», dedi E. Nysanbaev.
Jasyl jobalardy ilgeriletý úshin Readiness II jobasy aıasynda byltyr ázirlengen Eldik baǵdarlamaǵa 7 joba engizilgen. Jobalar energetıka sektoryndaǵy parnıktik gazdar shyǵaryndylaryn azaıtýǵa, aýyldy eldi mekenderdegi ortalyqtandyrylǵan sýmen jabdyqtaý júıeleriniń turaqtylyǵyn arttyrýǵa, mal sharýashylyǵy fermalaryn jańǵyrtýǵa, sondaı-aq «jasyl» qarjylandyrý salasyndaǵy jeke sektordyń bastamalaryn qoldaýǵa arnalǵan. Bul jobalardyń quny shamamen 1 mlrd dollardy qurasa, onyń 630 mıllıonyn atalǵan Qor qarjylandyrýy múmkin.
Sonymen qatar elimizde jańartylatyn energııa kózderi boıynsha Jasyl klımattyq qor men Eýropalyq Qaıta qurý jáne Damý banki baǵdarlamasy aıasynda jalpy qýattylyǵy 330 MVt bolatyn jańartylatyn energııa kózi salasynda 11 jobanyń qurylysyn qoldaý kózdelgen. Qazirgi ýaqytta 9 joba qarjylandyryldy. Ekologııalyq jobalar úshin aýqymdy halyqaralyq qarjylandyrýdy tartý Qazaqstannyń ekonomıkany dekarbonızasııalaýǵa jáne kómirtegi beıtaraptyǵyna qol jetkizýge baǵyttalǵan strategııalyq baǵytyn kórsetedi. Baǵdarlamany tabysty iske asyrý qorshaǵan ortaǵa ekologııalyq júktemeni edáýir tómendetýge, ınfraqurylymdy jańǵyrtýǵa jáne myńdaǵan jańa «jasyl» jumys oryndaryn qurýǵa jaǵdaı jasaıdy. Sarapshylar mundaı aýqymdy ınvestısııalar jergilikti ekologııalyq mindetterdi sheshýge yqpal etip qana qoımaı, klımattyń ózgerýine qarsy kúres jónindegi jahandyq bastamalarda elimizdiń senimdi áriptes retindegi ımıdjin nyǵaıtatynyn atap ótedi.
