Fotolar: Aqorda
«Prezıdent Radevtiń Qazaqstanǵa jasaǵan resmı sapary strategııalyq seriktestigimizdiń jańa kezeńi bastalǵanyn kórsetedi. Bul – bizdiń ortaq órkendeý jolyndaǵy yqpaldastyǵymyzǵa qozǵaý salady. Otyz jyldan astam ýaqyt ishinde Qazaqstan men Bolgarııa arasynda berik ári ózara qurmetke negizdelgen saıası jáne dıplomatııalyq qarym-qatynas ornady. Qazaqstan Bolgarııany dostas el ári óte mańyzdy strategııalyq seriktes sanaıdy. Degenmen saýda-ınvestısııalyq yntymaqtastyqta paıdalanylmaǵan áleýet jetkilikti. Eki el arasyndaǵy baılanysty jandandyrýda Qazaqstan-Bolgarııa ekonomıkalyq yntymaqtastyq jónindegi úkimetaralyq komıssııasy mańyzdy alańǵa aınalady dep sanaımyz», dedi Qazaqstan Prezıdenti.
Memleket basshysy elimiz ekonomıkalyq yqpaldastyqtyń jańa múmkindikterin ashýǵa daıyn ekenin jetkizip, basym baǵyttardy atap ótti.
«Birinshi – kólik qatynasy. Qazaqstan men Bolgarııa geografııalyq turǵydan ońtaıly ornalasqan. Eýrazııanyń qaq ortasynda turǵan bizdiń elimiz qurlyqaralyq baılanysty qamtamasyz etýde mańyzdy ról atqarady. Eýropa men Qytaı arasyndaǵy qurlyq arqyly tasymaldanatyn júktiń 85 paıyzy Qazaqstan aýmaǵymen ótedi. Orta dáliz ınfraqurylymyn damytýdyń arqasynda, ıaǵnı, zamanaýı temirjoldar, qurǵaq porttar men logıstıkalyq ortalyqtar sala otyryp, Shyǵys pen Batys arasyn burynǵydan áldeqaıda tıimdi jalǵaımyz. Byltyr atalǵan dálizdiń boıymen tasymaldanǵan júktiń kólemi 62 paıyzǵa ósip, 4,5 mıllıon tonnaǵa jetti. Budan osy baǵyttyń mańyzy arta túskenin ańǵarýǵa bolady. 2028 jylǵa qaraı joldyń júk ótkizý múmkindigi 10 mıllıon tonnaǵa deıin ulǵaıady. Bul baǵyt arqyly tasymaldanatyn júk kólemin arttyrýǵa nıettimiz jáne Qara teńizdegi negizgi logıstıkalyq ortalyq – Býrgas portynyń Orta dálizge qosylýyn quptaımyz», dedi Qasym-Jomart Toqaev.
Prezıdent ornyqty energetıkany perspektıvti baǵyttyń biri retinde atady.
Memleket basshysynyń aıtýynsha, Qazaqstannyń jańartylatyn energııa salasy aıtarlyqtaı ilgeriledi.
«Jasyl energetıkany damytý isinde iri halyqaralyq ınvestorlar úshin tartymdy elge aınaldyq. Búginde Qazaqstanda 150-den astam qaıta jańartylatyn energııa nysany bar. Olardyń qýattylyǵy 3 GVt-tan asady. Black Sea Energy bastamasy aıasyndaǵy birlesken kúsh-jigerimiz dekarbonızasııa boıynsha ortaq maqsattarymyzǵa qol jetkizýge yqpal etedi dep sanaımyz. Sondaı-aq Qazaqstan geologııalyq barlaý jumystaryn júrgizý jáne halyqaralyq jobalarǵa qatysý arqyly gaz óndirý kólemin ulǵaıtýǵa kúsh salady. Ýran óndirýde álemdegi kóshbasshy elmiz. Osy oraıda energetıkalyq qýatymyzdy arttyra túsetin atom stansııasynyń qurylysy bastalady. Bul ekonomıkalyq yntymaqtastyǵymyzǵa oń áser etedi», dedi Memleket basshysy.
Budan bólek, otandyq agrobıznestiń áleýetin arttyrýǵa basa nazar aýdaryldy.
«Bizdiń aýylsharýashylyq ónimderimiz álemniń 70-ten astam eline eksporttalady. Jyl saıyn naryqqa 8 mıllıon tonnadan astam bıdaı men eki mıllıon tonna un shyǵaratyn Qazaqstan álemdegi iri astyq eksporttaýshylardyń ondyǵyna kiredi. Bolgarııalyq seriktesterimizben et pen sút ónimderin, bal, ósimdik maıyn óndirýde yntymaqtastyqty damytýǵa múddelimiz. Shymkent qalasynda et óńdeý isine ınvestısııa quıýdy kózdep otyrǵan Lekkerbek kompanııasynyń nıetin qoldaımyz. Bul joba zamanaýı tehnologııalar engizip, aımaqtyń eksporttyq áleýetin kóterýge múmkindik beredi», dedi Prezıdent.
Qasym-Jomart Toqaev bolgarııalyq seriktestermen farmasevtıka sektorynda yqpaldastyq ornatýdyń áleýeti zor dep sanaıdy. Prezıdent óz sózinde sıfrlyq transformasııaǵa basa nazar aýdardy. Sonymen qatar Qazaqstanda memleket te, jeke sektor da óz isterine ozyq sıfrlyq sheshimderdi keńinen engizip jatqanyn aıtty.
«Básekege qabilettilikti arttyrý úshin jasandy ıntellekt tehnologııalaryn ázirleýdi qolǵa aldyq. Osylaısha, bul baǵytta júıeli jumys júrgizip jatqan alǵashqy elge aınaldyq. Ozyq IT ınfraqurylym jasaqtaý, sonyń ishinde sýperkompıýterler men málimetterdi óńdeý ortalyǵyn qurý Qazaqstannyń keleshektegi damýynyń ózegi bolmaq. Sonymen qatar jasandy ıntellektige negizdelgen ekonomıkany damytýǵa yqpal etetin Halyqaralyq jasandy ıntellekt ortalyǵyn iske qosamyz. Prezıdent myrza, Siz elińizdiń jasandy ıntellektini ıgerý jáne óziniń sýperkompıýterin jasaý isindegi keremet jetistikteri jóninde aıttyńyz. Atalǵan tabystaryńyz osy erekshe mańyzdy salada tájirıbe almasýǵa negiz bolady. Qazaqstanda CryptoCity pılottyq aımaǵy daıyndalý ústinde. Munda krıptovalıýtany kúndelikti saýda jasaýǵa, qyzmetterdiń aqysyn tóleýge jáne ekonomıkada keńinen paıdalanýǵa bolady», dedi Qasym-Jomart Toqaev.
Memleket basshysy Bolgarııa kompanııalaryn Astana halyqaralyq qarjy ortalyǵy usynatyn múmkindikterdi zerdelep, qarqyndy damyp kele jatqan AHQO ekojúıesine qosylýǵa shaqyrdy. Sóz sońynda Prezıdent Qazaqstannyń Bolgarııamen barlyq baǵyt boıynsha seriktestikti tereńdetýge daıyn ekenin rastady.
