Foto: Ashyq derekkóz
Úkimet otyrysynda «Qarmet» AQ basqarma tóraǵasy Vadım Basınniń málimdeýinshe, kompanııa jerasty kómir shahtalarynda baılanys jáne turǵylandyrý júıesin kezeń-kezeńimen engizip jatyr. Qazirgi tańda «Saran» jáne «Lenın atyndaǵy» shahtalarda bul júıe tolyq ornatylǵan. Jalpy alǵanda, tórt shahta zamanaýı júıemen jabdyqtalǵan. 2025 jyldyń sońyna deıin kómir departamentiniń barlyq segiz shahtasy jerasty baılanys jáne turǵylandyrý júıesimen qamtamasyz etiledi.
«Qazmyrysh» AQ da eńbek qaýipsizdigin arttyrý baǵytynda sıfrlyq quraldardy belsendi túrde engizip jatyr. Kompanııa bas dırektory Janat Janbotınniń aıtýynsha, sońǵy ýaqytta óndiristegi jaraqattaný jaǵdaılary 20%-ǵa azaıǵan. Bul jetistikke OneApp atty ıntegrasııalanǵan sıfrlyq platforma kómektesken.
Aıta keteıik, OneApp – ózara baılanysqan 13 modýlden turatyn biryńǵaı júıe. Ol óndiristegi aýytqýlardy, táýekelderdi, aýdıtter men ruqsattardy basqarý sekildi mańyzdy úderisterdi qamtıdy. Qazirgi tańda platformanyń 4000-nan astam belsendi qoldanýshysy bar, júıege web-ınterfeıs arqyly da, mobıldi qosymsha arqyly da qol jetkizýge bolady.
