Endi qaıtalanýy neǵaıbyl bolsa da, otandyq dárigerlerdiń biliktiligin synaqqa salǵan osynaý oqıǵany biz araǵa ýaqyt salyp baryp baıandap otyrýymyzdyń ózindik syry bar. Densaýlyǵy durystalǵan náreste dál osy kúnderi úıine, ata-anasynyń baýyryna oraldy. Ilýde bir kezdesetin mundaı kinárat álemdik medısına tájirıbesinde nebári 30 ret tirkelgen.
Sonymen sábıdiń ómiri úshin jantalas onyń jaryq dúnıege kelgen sátinen bastalǵan. Bet pen moıyn tusyndaǵy kólemi 4h4 santımetrlik úlken óskin keńirdek pen joǵarǵy tynys joldaryn qysyp tastaǵandyqtan, náreste ózdiginen dem ala almaǵan.
Mundaıda árbir mınýt sanaýly bolǵandyqtan, náreste shuǵyl túrde tasymal ınkýbatory bar reanımobılmen Balalar shuǵyl medısınalyq kómek kórsetý ortalyǵyna jetkiziledi. Dárigerler sábıdi birden ıntýbasııalaýǵa májbúr bolǵan, óıtkeni jasandy tynys alý apparatynan ajyratqan saıyn ol tunshyǵa bastaıtyn.
– Balanyń jaǵdaıy aýrýhanaǵa túsken kezde óte aýyr edi. Dem jetispeýshiligi, júrek-qantamyrlary jetkiliksizdigi men qan aınalymynyń durys emestigi baıqaldy. Náresteniń árbir tynys alýy – ómir úshin arpalys bolatyn, – dep eske alady sol sátti jańa týǵan náresteler reanımasııasy bólimshesiniń meńgerýshisi Ulyqpan Álseıitov.
Bastapqyda mamandar bul ádette jıi kezdesetin qatersiz – lımfangıoma isigi dep topshylaıdy. Alaıda, jaǵdaı odan da kúrdeli bolyp shyǵady. Rentgen, kompıýterlik jáne magnıttik-rezonanstyq tomografııa óskinniń ómirlik mańyzy bar qan tamyrlar men shetki júıke talshyqtaryna shapqanyn kórsetedi.
– О́skin jutqynshaq pen kómeıdi, qulaq mańyndaǵy jaq bulshyqetterin basyp, tynys joldaryn taryltqandyqtan, sábıdiń ómirin saqtaý úshin dereý ota jasaý týraly sheshim qabyldandy, – deıdi jaq-bet hırýrgi, medısına ǵylymdarynyń doktory Serik Nurmaǵanov.
Osydan keıin ortalyqtyń búkil múmkindigi shuǵyl iske qosylyp, reanımatologtar, jaq-bet hırýrgteri men nevrologtardan quralǵan birneshe konsılıým ota jasaý ádisin egjeı-tegjeıli pysyqtaıdy.
Otanyń árbir sáti zergerdiń qımylyndaı josparlanyp, operasııa brıgadasyn jaq-bet hırýrgi Serik Nurmaǵanov basqaratyn, anestezıologııaǵa Ulyqpan Álseıitov jaýapty boldy. Assıstent retinde – elimizdegi jetekshi neonataldy hırýrgterdiń biri, ortalyqtyń hırýrgııa bólimshesiniń meńgerýshisi Samatbek Myrzahmet tańdalady.
Eki saǵatqa sozylǵan kúrdeli ota kezinde kólemdi óskin túbirimen alynyp, náreste birinshi ret erkin tynys alǵany bilinedi. Degenmen, dárigerlerdi alda munan da kúrdeli tosynsyı kútip turǵan edi, gıstologııalyq zertteýlerdiń nátıjesi «isik» dep oılaǵan óskinniń mı tini ekenin anyqtaıdy. Bul – tájirıbeli mamandardyń ózin tańǵaldyrǵan jańalyq bolatyn.
– Geterotopııalyq mı tini – ishtegi sharana damyp jatqan kezde mı jasýshalarynyń bas súıek qýysy syrtyna ornalasýynan paıda bolatyn, asa sırek kezdetin týabitti anomalııa, – dep túsindiredi ortalyq dırektory Álibek Smaǵulov.
Statıstıkaǵa súıensek, kómeı-jutqynshaq aımaǵyna ornalasqan mundaı mı tini barlyq geterotopııalyq jaǵdaıdyń 0,1%-yna da jetpeıdi. Al Dúnıejúzilik medısınalyq ádebıette osyǵan uqsas oqıǵa nebári 30 jaǵdaı ǵana kezdesip, sıpattalǵan. Qysqasy, qaıǵyly jaǵdaıǵa dýshar etýi ábden múmkin oqıǵa jaqsylyqpen aıaqtalyp otyr.
Tanaýy pysyldaǵan kip-kishkentaı pasıent qazir ózdiginen tynys ala alady, emýdi úırenip, jaǵdaıy durystalǵan soń úıine shyǵaryldy.
– Prenataldyq dıagnostıkanyń mańyzy sonda – ekinshi, úshinshi skrınıng kezinde-aq uryqta bet pen moıyn tusyndaǵy túzilis anyqtalǵan. Hırýrgııalyq jolmen tolyq alynǵan jaǵdaıda, mundaı naýqastardyń ómir súrý múmkindigi joǵary, – deıdi Álibek Smaǵulov.
Qalaı desek te, otandyq medısına tarıhyna enetin osynaý oqıǵa – Balalar shuǵyl medısınalyq kómek kórsetý ortalyǵy dárigerleriniń kásibı biliktiligin dáleldeıtin jalǵyz jaǵdaı emes.
Máselen, 2024 jyly ortalyqta damýynan túrli kinárat tabylǵan 49 nárestege ota jasalsa, bıyl jyl basynan beri perzenthanalardan 24 náreste jedel hırýrgııalyq operasııa jasatý úshin osy ortalyqqa jetkizilgen.
