Sýretti túsirgen – Erlan OMAR, «EQ»
Ádette, qurban aıtta jaǵdaıy jetetin musylmandar qurbandyq shalady. Kóbinese qoı, keıde sıyr nemese túıe shalynady. Qurban maldyń eti úshke bólinip, qurban shalýshy ettiń bir bóligin muqtaj jandarǵa, taǵy bir bóligin týǵan-týysy men kórshilerge beredi. Qalǵan bóligin óz otbasyna qaldyrady.
Dástúrli musylman merekesinde elimiz qurban shalýdan bólek qaıyrymdylyq aksııalaryn uıymdastyryp, muqtaj otbasylarǵa, jalǵyzbasty qarttarǵa, kópbalaly analarǵa azyq-túlik taratyp júr. Sondyqtan da bul kúndi tek dinı mereke dep qana emes, birlik pen meıirim merekesi dep te ataıdy. Máselen, bıyl mereke qarsańynda avtobýs apatynan qos aıaǵynan aıyrylǵan Alýa esimdi qyzdyń otbasyna Astana qalasynyń ákimdigi jeke demeýshimen birlesip elordadaǵy jańa turǵyn úı kesheninen 4 bólmeli páterdiń sertıfıkatyn tabystady. Sonymen qatar qurban maldyń aqshasyn zardap shekken qyzdyń anasyna jóneltip otyrǵan janashyr jandar da bar. Sonyń biri belgili pýblısıst Qaınar Oljaı aǵamyz.
– Buǵan deıin dinı rásim boıynsha qurbandyq shalyp, úshke bólip, muqtaj jandarǵa taratatynmyn. Al bıyl qoǵamdaǵy ahýalǵa baılanysty qurban shalatyn qarjymdy zardap shekken qyzdyń anasyna aýdardym, – dedi ol.
Meıirim merekesi qarsańynda ótken jyldary «Myń alǵys» respýblıkalyq aksııasy aıasynda el azamattary birlesip, muqtaj 50 otbasyna kómek qolyn sozǵan bolatyn. Al baspanaǵa zárý kópbalalaly otbasyna berilip otyrǵan páterler sany da jyl saıyn artyp keledi. Osylaısha, áý bastan ar-ımanyn, obal-saýabyn túgendegen qazaq qoǵamy eldik, ulttyq baǵdaryn jańǵyrtyp otyr.
