Foto: atr.kz
Oqý-aǵartý mınıstrliginiń málimetinshe, bıyl osyndaı jazǵy lagerlerge shamamen 600 balany qamtý josparlanǵan.
Jańa formattaǵy lagerlerdiń biri - Besqaraǵaı kolledjiniń bazasyndaǵy ekologııalyq-agrarlyq «EKOorman» lageri. Munda balalar landshafttyq dızaın, jylyjaı sharýashylyǵy, florıstıka, aýyl sharýashylyǵyn mehanızasııalaý negizderimen tanysady.
Al «SmartKriS» sıfrlyq lageri IT jáne jańa tehnologııalar Joǵary kolledjiniń bazasynda jumys isteıdi. Ol eki aýysymda uıymdastyrylǵan. Oqýshylar robototehnıka, baǵdarlamalaý, veb-dızaın, CAD-grafıka baǵyttaryn meńgeredi. Oqytý WorldSkills standarttaryna saı praktıkalyq tapsyrmalar men oıyn keısteri arqyly ótedi.
О́ńirdegi polıtehnıkalyq kolledjde shyǵarmashylyq baǵyttaǵy «Summer Camp» lageri ashyldy. Baǵdarlama eki jas sanatyna bólingen. Balalar tiginshilikpen, aspazdyqpen aınalysyp, fetr men monshaqtan buıymdar jasaıdy, sheberlik saǵattaryna jáne sporttyq jarystarǵa qatysady.
Bıyl alǵash ret Úrjar kolledjinde «Úrjar-Aıym» lageri esik ashty. Munda aýyldyq mektep oqýshylary ustazdarymen birge agrarlyq is, veterınarııa, aspazdyq, dánekerleý jáne basqa da qoldanbaly baǵyttar boıynsha tájirıbe men sheberlik sabaqtarynan ótip jatyr.
R.Baıseıitov atyndaǵy Semeı qarjy-ekonomıkalyq kolledjinde SFEK Summer Camp lageri jumys isteıdi. Munda oqýshylar grafıkalyq dızaın, veb-ázirleý, býhgalterlik eseptiń negizderi jáne mobılografııany meńgeredi. Sondaı-aq kóshbasshylyq, komandada jumys isteý jáne taım-menedjment boıynsha trenıngter qamtylady.
Shákárim atyndaǵy Semeı joǵary kolledji «Tolaǵaı» lagerin iske qosty. Onda ulttyq mádenıet, ekologııa jáne densaýlyq taqyryptaryna basa nazar aýdarylǵan. Baǵdarlamada qoldanbaly óner, mýzyka, vıktorınalar, logıkalyq oıyndar qamtylǵan.
Elektrotehnıkalyq kolledj praktıkalyq baǵyttaǵy IT lagerin ashty. Oqýshylar startap-jobalarǵa, hakatondarǵa qatysyp, sıfrlyq saladaǵy óndiristik prosesterdi meńgerýde.
«Kásibı baǵdarlaý lagerleri – oqýshylardyń óz qabilet-qarymyn is júzinde baıqap kórýi jáne mamandyqtar týraly túsinik qalyptastyrýy úshin mańyzdy alańǵa aınalýda. Buǵan ásirese, Jumysshy mamandyqtary jyly aıasynda basymdyq berilip otyr. Osylaısha, kolledjder jastardyń áleýetin ashýǵa óz úlesterin qosýda», deıdi oblystyq bilim basqarmasynyń basshysy Baýyrjan Týlenov.
Aıta keteıik, jazǵy kezeńde elimiz boıynsha jalpy 10 myńnan astam lager jumys isteıdi. Onda 3,2 mln bala ýaqytyn tıimdi ótkizedi.
