Saltanatty rásimge Parlament Májilisi men Astana qalasy máslıhatynyń depýtattary, belgili qalamgerler Tólen Ábdik, Serik Turǵynbekuly, О́ris Iаshúkirqyzy, Kamal Álpeıisova, aqynnyń otbasy men shákirtteri qatysty.
Jıyndy ashqan Qazaqstan Jazýshylar odaǵy Astana fılıalynyń dırektory, aqyn Baýyrjan Babajanuly Qonysbaı Ábil qazaq ádebıetiniń qazynasyn, onyń ishinde aıtys ónerin barynsha baıytyp ketkenin, sondaı-aq Astanada ult mádenıetiniń damýyna qosqan úlesiniń ólsheýsiz ekenin atap ótti.
«Qonysbaı Ábildiń uıymdastyrýymen Astana qalasynda respýblıkalyq deńgeıde 10 ret aqyndar aıtysy ótkizildi. Jas urpaqty halyq ertegileri keıipkerleri rýhynda tárbıeleý maqsatynda «Tazsha bala» baıqaýy qolǵa alynyp, el ishindegi kóptegen talanttardyń tanylýyna jol ashty», dedi Baýyrjan Babajanuly.
Alǵashqy bolyp sóz alǵan Memlekettik syılyqtyń laýreaty, jazýshy Tólen Ábdik búgingi is-shara Astananyń rýhanı álemi men qazaq qoǵamyndaǵy úlken oqıǵa ekenin aıtty. Ult rýhanııatyn bıikke kótergen birtýar azamattyń kisilik kelbeti men tulǵalyq qasıetine toqtaldy.
Sonymen birge Parlament Májilisiniń depýtaty, aıtysker aqyn Amanjol Áltaev, Astana qalasy máslıhatynyń depýtaty Qanat Estek sóz sóılep, estelikter aıtty. Aqynnyń týystary atynan sóz alǵan Aqtorta Iskendirqyzy Astana qalasy ákimdigine, qalalyq Tilderdi damytý jáne arhıv isi basqarmasyna alǵysyn jetkizdi.
Eskertkish taqtany jazýshy Tólen Ábdik pen aqynnyń apasy Aqtorta Iskendirqyzy ashty.
Qonysbaı Iskendiruly Ábil ult rýhanııaty men mádenıetine eleýli eńbek sińirgen kórnekti qaıratker, sazger, satırık, jýrnalıst, Qazaqstannyń halyq aqyny. О́leńderi men ánderi halyq arasynda keńinen taralǵan.
Qonysbaı Ábil elordada Tilderdi damytý basqarmasyn ashyp, ana tilimizdi órkendetý baǵytynda bel sheshe eńbek etti. Sol kezdegi Astana qalasy ákiminiń orynbasary Tólegen Muhamedjanovtyń basshylyǵymen basqarma janynan «Rýhanııat» memlekettik tildi jedeldetip oqytý ortalyǵy ashylyp, onda ózge ult ókilderi arnaıy daıarlyqtan ótti.
Sol sekildi Naýryz meıramyn halyqtyq mereke retinde toılaý, Til festıvalin qalyptastyrý, Abaı eskertkishi janynda «Poezııa saǵatyn» uıymdastyrý, elordada turatyn qalamgerlermen kezdesýler ótkizý dástúrge aınaldy.
Elorda tórinde «Áı-áı aqynǵa» eskertkish taqtanyń ashylýy halyq aqynyna arnalǵan ıgi isterdiń bastaýy bolary anyq.
Muharbek Jákeıuly, jýrnalıst
