Aýdanda jańadan salynyp jatqan mektepter, turǵyn úıdi jańǵyrtý baǵdarlamasy jáne Qarasý ózeniniń jaǵalaýyn abattandyrý barysymen tanysty. Osy oraıda qala basshysy qurylys kompanııalaryna jol jóndeý jumystaryn jańa oqý jyly bastalǵanǵa deıin aıaqtaýdy tapsyrdy.
Kemel shaǵynaýdanyndaǵy kóshkin qaýpi bar aýmaqty jóndeý jumystary qolǵa alynbaqshy. Qazir uzyndyǵy 580 metr bolatyn tireý qabyrǵalaryn salý jobasy ázirlenýde. Jumys tobys sondaı-aq, Kemel shaǵynaýdanyndaǵy Qarasý ózeniniń jaǵalaýyn kúrdeli jóndeý jobasymen tanysty. Jobaǵa balalar jáne sport alańdaryn, amfıteatr, skeıt-park, besedkalar, oryndyqtar, qoqys jáshikteri, art-nysandar, jaryq tirekteri, avtomatty sýarý júıesi, gabıonmen jaǵalaýdy nyǵaıtý, beınebaqylaý ornatý jáne kógaldandyrý kiredi. Jumystar osy aıda bastalyp, kelesi jyldyń sáýir aıynda aıaqtalady dep josparlanýda.
Bıyl aýdanda 26 shaqyrym jol ortasha jóndeýden ótedi, onyń 15 shaqyrymy Kemel shaǵynaýdanynda ornalasqan.
«Buryn da aıtqanmyn – barlyq jol jóndeý jumystaryn jańa oqý jyly bastalǵanǵa deıin aıaqtaý qajet. Aýdan ákimi tikeleı baqylaýǵa alýy kerek», – dep atap ótti Darhan Satybaldy.
Búginde Jetisý aýdanynda 21 memlekettik mektep jumys isteıdi. Alaıda halyq sanynyń ósýi men belsendi qurylysqa baılanysty 4 myńnan astam oqýshy orny jetispeıdi. «Keleshek mektepteri» ulttyq jobasy aıasynda ákimdik jobalyq ofısiniń qoldaýymen Býrýndaı kóshesinde 1 200 oryndyq jańa mekteptiń qurylysy bastaldy. Sol aýmaqta mektep salyp jatqan merdiger kompanııa 4 myń páterlik turǵyn úı keshenin de salyp jatyr, onyń 2,3 myńyn jumysshy jastar men halyqtyń áleýmettik osal toptaryn baspanamen qamtýǵa arnalǵan áleýmettik baǵdarlamalar aıasynda ákimdik satyp almaq. Osyny eskerip, qala basshysy bilim berý nysanynyń qurylysyn barynsha jedeldetýdi talap etti.
«Eger mektepti ýaqytynda tapsyrmasańyzdar – biz áleýmettik baǵdarlamalar úshin páter satyp almaımyz. Eshqandaı sóz bolmaıdy, tapsyrmasańyzdar – satyp almaımyz», – dedi Darhan Satybaldy.
Sondaı-aq, qala ákimi Aınabulaq (Arbat) shaǵynaýdanyndaǵy jáne Maqataev kóshesindegi jaıaý júrginshi joldaryn abattandyrý jáne aǵymdaǵy jóndeý jumystarymen tanysty. Joba aıasynda kógaldandyrý, jaryqtandyrý, jaıaý júrginshi joldaryn tóseý jáne shaǵyn sáýlet nysandaryn ornatý qarastyrylǵan.
Aınabulaq-1 shaǵynaýdanynda qala basshysy «Halyq qatysatyn bıýdjet» baǵdarlamasy aıasynda aýlalardy abattandyrý jumystaryn tekserdi. Bul baǵytta asfalt tóselip, rezeńke jabyn ornatylǵan, sport alańy jańartylǵan, jaryqtandyrý, beınekameralar men shaǵyn sáýlet formalary qoıylyp, kógaldandyrý júrgizilgen.
Sonymen qatar, Darhan Satybaldy 1981 jyldan beri paıdalanylyp kele jatqan jylý jelileriniń qaıta jańǵyrtý jumystarymen de tanysty. Qala ákimi bul jumystardy bıyl tamyzyna deıin aıaqtaýdy tapsyrdy.
Qazirgi kezde aýdanda turǵyn úıdi jańǵyrtý baǵdarlamasy iske asyp jatyr. Krylov–Skrıabın–Goncharov–Raıymbek dańǵyly kósheleri aralyǵyndaǵy aýmaqta 16 úı súrilip, turǵyndar kóshirilgen, 9 úı salynyp, taǵy 2 úıdiń qurylysy júrip jatyr. Botkın–Qazakov–Goncharov–Skrıabın–Raıymbek dańǵyly aýmaǵynda 6 úı súrilip, 3 úı salynǵan jáne tapsyrylǵan, 8 úıdiń qurylysy júrip jatyr, olardyń qurylysy 2027 jylǵa deıin aıaqtalady dep josparlanǵan. Sonymen qatar, jańǵyrtý baǵdarlamasynan tys jeke ınvestısııalar aıasynda 10 eski úı men 11 jeke turǵyn úıdi súrý josparlanǵan. Alaıda ákim 100 myń sharshy metr úı salynǵanymen, birde-bir mektep, birde-bir balabaqsha, birde-bir emhana joq ekenin eskertip, aldaǵy ýaqytta qaıta qarastyrýdy tapsyrdy.
ALMATY
