Ulttyq qor esebinen «Taldyqorǵan – Úsharal» magıstraldy gaz jelisiniń qurylysyna 131,7 mlrd teńge bólingen. Sol arqyly 124 myń turǵyny bar Aqsý, Sarqan, Alakól aýdandary tabıǵı gazǵa qol jetkizedi. Qazir gaz qubyrynyń jelilik bóligin salý jumystary aıaqtalǵan. Avtomatty gaz taratý stansalary turǵyzylyp jatyr. Jalpy, 6 gaz qubyry-burmasyn jáne «Jansúgirov», «Qapal», «Sarqan», «Qoılyq», «Qabanbaı», «Úsharal» – 6 avtomatty gaz taratý stansasyn salý kózdelgen.
«Bul – Memleket basshysynyń tapsyrmasymen, Ulttyq qordyń qarjylaı qoldaýymen qolǵa alynǵan aýqymdy joba. О́tken jyly Úkimet basshysy Jetisý oblysyna kelgende qurylys jumystary bastalǵan bolatyn. Jobanyń áleýmettik mańyzyn eskere otyryp, jumysty qarqyndy júrgizdik. Nátıjesinde, jobany belgilengen merziminen erterek aıaqtaımyz dep josparlap otyrmyz. Bul «QazaqGaz», oblys ákimdigi jáne merdiger kompanııa – úsh taraptyń birlesken úlgili komandalyq jumysynyń nátıjesi», deıdi óńirge saparmen kelgen «QazaqGaz» UK» AQ basqarma tóraǵasy Sanjar Jarkeshov.
Stansalardyń daıyndyǵy osy jyldyń tamyz aıyna josparlanǵan. Qurylysqa 148 birlik arnaıy tehnıka men 356 jumysshy personal jumyldyryldy. Qurylys jumystary erekshe baqylaýda jáne kesteden ozyp keledi.
Osy oraıda oblys ákiminiń orynbasary Áset Qanaǵatov eldi mekenderdiń ishki jelilerin júrgizýdiń daıyndyq jumystary týraly aıtty.
«6 eldi mekendi bıyl, qalǵan 60-yn kelesi jyly gazǵa qosamyz. Sonyń ishinde Aqsý qant zaýyty da bar. Osy sharalardyń barlyǵy halyqtyń turmys sapasyn jaqsartýda, kásipkerlik pen óndiris oryndarynyń jumysy úshin tıimdi. Bul óńir ekonomıkasyn damytýǵa úlken serpin beredi», deıdi oblys ákiminiń orynbasary Áset Qanaǵatov.
Jetisý oblysynda 192 eldi meken gazdandyrýǵa jatady. Oblys bólingende nebári 5 eldi mekende ǵana gaz bolsa, búginde ıgilikke qol iliktirgen eldi meken sany 84-ke jetip, gazdandyrý deńgeıi 58,2% boldy. Jyl sońyna deıin kógildir otyn tartylǵan eldi meken sanyn 126-ǵa, gazdandyrý kórsetkishin 71,4%-ǵa jetkizý josparlanyp otyr. «Taldyqorǵan – Úsharal» magıstraldy gaz qubyry qurylysynyń arqasynda 66 eldi meken gazǵa qosylyp, 2028 jylǵa deıin oblystyń gazdandyrýǵa jatatyn 192 eldi mekeni tolyq kógildir otynǵa qol jetkizbek.
Jetisý oblysy
