«Akvasharýashylyq týraly» Zańnyń maqsaty – jańa óndirister qurý, jumys istep turǵan kásiporyndardy keńeıtý, básekege qabiletti akvasharýashylyq nysandaryn kóbeıtý, sondaı-aq qorshaǵan ortaǵa jáne adam ómiri men densaýlyǵyna qaýipsiz etý arqyly akvasharýashylyqty turaqty damytý.
Qujatqa jańa óndiristerdi qurý jáne jumys istep turǵan kásiporyndardy keńeıtý maqsatynda ınvestısııalyq jobalardy ǵylymı súıemeldeý engizildi. Sonyń nátıjesinde bıýdjet qarajaty esebinen bızneske aqparattyq-taldamalyq jáne ǵylymı-ádistemelik qoldaý kórsetiledi.
Sondaı-aq Zańda sýbsıdııalaý, jeńildikpen nesıeleý, saqtandyrý, salyq preferensııalary, ınjenerlik-kommýnıkasııalyq ınfraqurylymmen qamtamasyz etý jáne basqa da memlekettik qoldaý sharalary kózdelgen.
Zańda akvasharýashylyq sýbektileri júzege asyratyn qyzmet túrleri, sondaı-aq balyq sharýashylyǵy sý aıdyndary men osyndaı qyzmetti júzege asyrýǵa arnalǵan ýchaskeler (halyqaralyq, respýblıkalyq jáne jergilikti) naqty bólingen.
Sý bıologııalyq resýrstaryna jáne olardyń tirshilik etý ortasyna zııan keltirmeý úshin Zańda balyq sharýashylyǵy sý aıdyndaryn utymdy paıdalanýdyń negizgi qaǵıdaty belgilengen. Sonymen qatar akvasharýashylyq salasyna memlekettik baqylaý engizildi. Bul janýarlar dúnıesin qorǵaý, onyń ósimin molaıtý jáne paıdalaný baǵytyndaǵy baqylaýdyń bir bóligi sanalady.
Sondaı-aq Jer, Orman, Ekologııalyq jáne Kásipkerlik kodeksterge, sondaı-aq 14 zańǵa túzetýler engizildi.
Túzetýlerdiń birinshi blogy zańnamalyq aktilerdi qabyldanǵan jáne qol qoıýǵa usynylǵan «Akvasharýashylyq týraly» Zańǵa sáıkes keltirýge baǵyttalǵan.
Jer kodeksine engizilgen túzetýlermen akvasharýashylyqty júrgizý úshin sý qory jerleriniń quramynan jer ýchaskelerin berý múmkindigi belgilendi. Bul rette akvasharýashylyqty júrgizýge arnalǵan jer ýchaskelerin berý úshin konkýrstyq ótinimge qoıylatyn talaptar reglamenttelgen.
Orman kodeksine engizilgen túzetýlermen memlekettik orman qory ýchaskelerinde balyq ósirý jónindegi qyzmetti júzege asyrý múmkindigi belgilendi.
Janýarlar dúnıesin paıdalanýǵa arnalǵan lımıtter men kvotalardy belgileýge qoıylatyn talaptar qaıta qaraldy.
«Agroónerkásiptik keshendi jáne aýyldyq aýmaqtardy damytýdy memlekettik retteý týraly» Zań agroónerkásiptik keshen sýbektilerin memlekettik qoldaý sharalarynyń jańa nysandarymen tolyqtyryldy.
Túzetýlerdiń ekinshi blogy «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Qazaqstan Respýblıkasy Prezıdentiniń 2024 jyldyń 3 qańtaryndaǵy № 429 Jarlyǵyn iske asyrýǵa baǵyttalǵan, soǵan sáıkes Ekologııa jáne tabıǵı resýrstar mınıstrliginiń balyq sharýashylyǵy salasyndaǵy fýnksııalary men ókilettikteri Aýyl sharýashylyǵy mınıstrligine berilgen. Osyǵan baılanysty atalǵan memlekettik organdar arasynda fýnksııalar Zańmen qaıta bólindi.
