Alash arysynyń esimin ıelengen mekteptiń 1-6 synyp oqýshylary eki maýsymda bilim ordasyndaǵy lagerde demalady. Olardyń ýaqytyn tıimdi úılestirý úshin aldyn ala eńbek jáne shyǵarmashylyq belsendilik, týrıstik jáne tanymdyq marshrýttar, zııatkerlik ári bilim berý is-sharalary syndy baǵdarlamalar bektilgen. Mektep-lıseı dırektory Qııaqbaı Nurılanyń aıtýynsha, barlyq ata-ana qarjylyq turǵysynan balasyn tańdaýly lagerlerge attandyra almaıdy. Osy tustan kelgende mektep janyndaǵy lagerlerdiń orny eleýli.
«Biz lager barysynda balalardy shynaı baqytty etip, mentaldy saýlyǵyna nazar aýdarýdamyz. Sondaı-aq, shákirtterimizdiń áleýmettik ómirge aralasa alýy, sabaqtan tys dos tabýy, jaıly ortasyn qalyptastyrýyna septesip, jumylyp otyrmyz. Osy sharalarǵa 250 bala qamtylady. Mektep tek oqýshyǵa bilim alatyn oryn bolýmen shektelmeı, olardy qoǵamǵa nyq qadam bastyratyn mekeme bolýy kerek», dedi A. Baıtursynuly atyndaǵy №48 mektep-lıseıiniń dırektory.
Jahandaný kezeńinde jutylmaýdyń joly búgingi urpaqty tarıhı tegine úńildirip ósirý. Ata-baba murasynan qol úzdirmeý úrdisinde lagerdegi úıirmeler osy maqsatpen úndestirilgen. «Jas urpaqqa ulttyq qundylyqty uǵyndyrmaı jalpyadamzattyq negizdi uǵyndyrý qaýipti. Sondyqtan mektebimizde arnaıy «Tolaǵaı» ulttyq sport zalynyń esigin ashtyq. Munda oqýshylar sadaq atyp, serke kóterip, arqan tartý úshin qajetti baza qalyptastyrylǵan. Sabaq barysynda ulttyq oıyndardyń shyǵý tórkini, erejeleri túsindiriledi. Bul qadam arqyly shákirtterimizdiń shymyr ári rýhty bolyp jetilýine jete kóńil bólip otyrmyz», dedi Nurıla Baqtııarqyzy.
Búgin osy sport alańynda ákeler men balalar túrli saıysta baq synady. Tirshilik tynysymen ata-ananyń balaǵa sapaly ýaqyt arnaýy kúrdelene túsken tusta ákelerdiń bala kóńilin baǵýy mańyzdy másele. Bul týraly sharaǵa belsendi qatysqan áke Nurlybek Jorabekuly sóz qozǵady.
«Rasynda elimizde áke men balanyń araqatynasy aqsap tur. Áke men balanyń jarqyn ýaqyt ótkizýi, fýtbol oınaýy, sadaq atýy, atqa shabýy kem kóretin kóriniske aınalǵany jasyryn emes. Tárbıeni mektepke nemese anaǵa ǵana artyp qoımaı ákeler de at salysýy tıis. Osy uranmen A.Baıtursynuly atyndaǵy №48 mektep-lıseıi uıymdastyrǵan estafetaǵa kelip otyrmyz. Bul sporttyq sharada áke men bala arasynda til tabysý men qoldaýdyń qanshalyqty baǵaly ekeni aıqyn kórinip otyr», dedi Nurlybek Jorabekuly.
Lagerde balalar sýret salyp, til úırenip, zertteý júrgizýmen qatar sáýirde egilgen mekteptiń jylyjaıyn kútip, baptaıdy. Mektep ujymy kókónister ónimin az qamtylǵan otbasylarǵa úlestirýdi josparlap otyr. Tabıǵat qushaǵyna enip, ónimniń mol bolýyna beıil bolyp júrgenderdiń biri bıyl 4-shi synypty aıaqtaǵan – Muhamedı Sultan.
«Lagerde kóńil kóterý, tanymdyq saıahatpen qatar jylyjaı bolǵany qýantady. Munda kókónisterdi ósirýdiń túrli tásilderin meńgerip jatyrmyz. Ustazdarymyz sý quıý ýaqytyn, aram shópterin tazalaý, topyraq qunarlyǵyn arttyrý týraly baǵyt-baǵdar berip otyrdy. Bul úırengenderimizdi bolashaqta da kádege jarata alamyz», dedi Muhamedı Sultan.
Oqý-aǵartý mınıstrliginiń málimetinshe, bıyl elimizde 10 myńnan astam mektep janyndaǵy lager jumys istep tur. Olardyń tynysy búgin biz bederlegen lagerdegideı órilse ulttyq qundylyǵymyz quldyramasy anyq.
