Jańa óndiris oshaǵynyń saltanatty ashylý rásimine oblys ákimi Erbol Qarashókeev, oblystyq máslıhat depýtattary, aýdan ákimshiligi men aýyl turǵyndary qatysty.
– Memleket basshysy Qasym-Jomart Kemeluly Toqaevtyń ınvestısııalyq jobalardy qoldaý jáne jańa óndiris oryndaryn ashý jónindegi tapsyrmasyn oryndaý maqsatynda óńirde júıeli jumystar júrgizilýde. Búgin iske qosylǵan kásiporyn – osy bastamalardyń naqty jemisi. Bul zaýyt el ekonomıkasynyń damýyna jáne jergilikti halyqtyń ál-aýqatyn jaqsartýǵa baǵyttalǵan mańyzdy jobalardyń biri.
«Týǵan jerge týyńdy tik» degen halyq danalyǵyn ustana otyryp, týǵan ólkesine ınvestısııa salyp, iskerlik tanytqan azamattarǵa alǵysymdy bildiremin! О́ndiris oshaǵynyń jumysy jemisti bolsyn! – dedi oblys ákimi quttyqtaý sózinde.
Budan soń Erbol Qarashókeev aýdandyq ardagerler keńesiniń tóraǵasy Berdibek Omarovpen birge zaýyttyń lentasyn qıdy.
Jobany «JS GLASS» JShS júzege asyrdy. Investısııa kólemi – 1 mlrd teńge. Kásiporyn jylyna 100 myń sharshy metr shyńdalǵan shyny óndirýge qaýqarly.
Zaýyt quryltaıshysy Jamalhan Ibragımovtiń sózinshe, munda sapa men qaýipsizdik talaptaryna saı zamanaýı tehnologııalar qoldanylady. Shyny óńdeý kesheninde 40 aýyl turǵyny turaqty jumyspen qamtylyp otyr.
О́ndiris orny óńirdiń ishki qajettiligin tolyq qamtamasyz etip, ónimderin Almaty jáne Túrkistan oblystarynyń naryǵyna shyǵarady.
– Sońǵy úlgidegi qondyrǵylarmen jumys isteýdi qytaılyq mamandardyń kómegimen bir aı ishinde meńgerdik. Aýylymyzda zaýyttyń ashylǵanyna óte qýanyshtymyn. Jumysym ózime unaıdy, – deıdi Úlgili aýylynyń turǵyny, zaýyt qyzmetkeri Dastan Abdelıev.
