Atyraý oblystyq bilim basqarmasynyń ókili Qadyrjan Saparovtyń aıtýynsha, mektepter janyndaǵy lagerler sany 727-ge jetedi. Onda 120 myńǵa jýyq bala demalady.
«Jaz mezgilinde oqýshylardy 3 saýyqtyrý lagerine demalýǵa jiberý kózdelip otyr. Lagerdiń biri – Reseı Federasııasynyń Jeleznovodsk qalasyndaǵy «Qazaqstan geologi» emdeý pansıonaty. Oǵan arnaıy sanatqa engen otbasylardaǵy 1 530 balanyń demalysy uıymdastyrylady. Al Inder men Mahambet aýdanyndaǵy lagerlerde demalatyn oqýshylardyń sany 1 500-ge jýyqtaıdy», deıdi Qadyrjan Saparov.
Onyń aıtýyna qaraǵanda, áleýmettik turmysy tómen otbasylardaǵy balalar erekshe nazarǵa alynady. Ásirese jetim, ata-ana qamqorlyǵynsyz qalǵan, arnaıy sanattaǵy jáne qolaısyz otbasylardaǵy, quqyq qorǵaý organdarynyń esebinde turǵan balalar jazǵy demalyspen tolyqtaı qamtylady. Jaz mezgilinde oblystaǵy barlyq mýzeı arnaıy sanattaǵy balalar úshin tegin qyzmet kórsetedi.
«Respýblıkalyq bıýdjet esebinen 4 lagerge 608 balany jiberemiz. Al jergilikti bıýdjet qarjysymen 100-den astam oqýshy úshin elimizdiń tarıhı, kórikti mekenderine ekskýrsııa uıymdastyrý josparlanyp otyr», dep málimdedi Q.Saparov.
Jazǵy lagerdiń biri «Jaıly mektep» jobasymen iske qosylǵan №50 bilim ordasynyń janynan ashyldy. Bul lagerge «Jaıly Camp» ataýy berilipti. Oǵan bastaýysh synyptan 50 oqýshy qabyldandy.
«Lagerdiń jumysyn uıymdastyrý úshin Úkimettiń №64 qaýlysy negizge alyndy. Soǵan sáıkes lagerge kópbalaly, kúnkóris deńgeıi tómen, sondaı-aq ataýly áleýmettik kómek alatyn otbasylardyń balalary keledi. As máziri balalardyń jas erekshiligine qaraı ázirlenedi. Balalardyń qaýipsizdigi úshin barlyq jaǵdaı jasalyp otyr. Lagerde jumys isteýge bilikti mamandar tárbıeshiler oqýshylardyń bos ýaqytyn tıimdi uıymdastyryp, túrli tanymdyq, sporttyq jáne mádenı is-sharany ótkizýdi qolǵa aldy», deıdi lager jetekshisi Qurmangúl Ahmedıarova.
Lagerge alǵash kelgendiń qatarynda Aızere Amanqos ta bar. Onyń ata-anasy – kópbalaly otbasy.
«Jańadan ashylǵan lagerge kelgenime qýanyp júrmin. Maǵan óte unady. Tamaǵy dámdi, tárbıeshiler meıirimdi eken. Kóp dos taptym. Kún saıyn túrli konsert pen sporttyq oıyndar ótkiziledi. Ár kúnimiz erekshe ótip jatyr», deıdi Aızere Amanqos.
Atyraý oblysy
