Qazaqstan hokkeıshileri – Ýnıversıadanyń kúmis júldegeri

ASTANA. 15 aqpan. Ispanııanyń Granada qalasynda ótip jatqan qysqy Ýnıversıada sheńberinde Qazaqstannyń hokkeıden erler arasyndaǵy stýdentter quramasy búgin túnde fınalda Reseı komandasynan 1:3 esebimen utylyp, kúmis júldeger atandy. Bul týraly Vesti.kz tilshisi habarlady. Matchtaǵy esepti birinshi bolyp reseılikter ashty. Olar 3-mınýtta Tımýr Shıngarevtiń mergendigimen alǵa shyqty. Arada 11 mınýt ótkende, esep ulǵaıa tústi. Bul joly Egor Krıvchenko erledi. Ekinshi kezeńde qarsylastar taǵy bir shaıba salyp tablodaǵy kórsetkishti 3:0-ge jetkizdi. Muny Aleksandr Torchenıýk jasady. Úshinshi kezeńde bizdiń jigitter bir shaıbanyń qarymtasyn qaıtardy. Jalǵyz goldy Vladıslav Elakov pen German Nesterovtan pas alǵan Renat Safın túsirdi. Osy esep matchtyń sońyna deıin ózgergen joq. Aıta keteıik, Qazaqstannyń stýdentter quramasy munyń aldynda, 2013 jyly ótken qysqy Ýnıversıadada da kúmis júldeli bolyp edi. Sol joly Italııanyń Trentıno qalasynda oınalǵan fınaldyq kezdesýde Kanada stýdentterinen 2:6 bolyp utylǵanbyz. Al Granadada munyń aldynda Ýnıversıadanyń úshinshi orny úshin Kanada jáne Chehııa talasty. Match «Úıeńki japyraǵy» eli hokkeıshileriniń aıqyn basymdylyǵymen bitti. Oıynnyń basynda biraz qarsylasqan chehtar sodan keıin oıyn tizginin qarsylastaryna birjola berip qoıdy. Nátıjesinde 2:6 esebimen utyldy. Eske sala keteıik, Ýnıversıadada Qazaqstan stýdentteri kúni búginge deıin 11 júlde jeńip aldy. Olardyń arasynda 5 altyn, 6 kúmis medal bar. Sportshylar arasynda Anastasııa Slonova Ýnıversıadanyń eki dúrkin chempıony atandy. Al týrnırde Reseı quramasy 20 altyn, 18 kúmis jáne 18 qola medalmen oq boıy alda keledi. Damır Qojamqul. Derek, foto: Vesti.kz.