Qabyldaý qala turǵyndaryna barynsha yńǵaıly bolýy úshin Halyqqa qyzmet kórsetý ortalyǵynyń janynda uıymdastyryldy. Azamattarmen kezdesýge partııa múshelerimen qatar, oblystyq basqarmalar, quqyq qorǵaý organdary, zańgerler men advokattar qatysty.
Is-shara barysynda turǵyn úı-kommýnaldyq sharýashylyǵy, ınfraqurylymnyń tozýy, jer telimin rásimdeý, áleýmettik kómek, quqyqtyq keńes pen eńbek qatynastaryna qatysty suraqtar jıi qoıyldy. Keıbir azamattar kommýnaldyq tólemder men úı salýǵa baılanysty máselelerin kóterse, endi biri alıment óndirip alý, muragerlik jáne eńbek daýlary boıynsha zańgerlik keńes aldy.
Qabyldaýda kópten beri qoǵamda talqylanyp kele jatqan máselelerdiń biri – Aýǵan soǵysyna qatysqan azamattardyń áleýmettik mártebesi de sóz boldy. Almaty oblystyq ardagerler keńesiniń tóraǵasy Qanat Moldabergenov bul suraq birneshe ret mınıstrlikke jetkizilgenimen, naqty sheshim qabyldanbaǵanyn atap ótti.
«Aýǵan soǵysyna qatysqan ardagerler 1995 jylǵy zań boıynsha Uly Otan soǵysy ardagerlerine teńestirilgen bolatyn. Biraq 2010 jyldan bastap bul mártebeden aıyryldyq. Sonyń saldarynan medısınalyq kómek, turǵyn úı, qoǵamdyq kóliktegi jeńildikter toqtady. Biz mártebemizdi jáne tıisti áleýmettik qoldaýlardy qaıtarýdy talap etemiz», – dedi Qanat Moldabergenov.
Bul máselege qatysty partııa óz ustanymyn bildirdi. «AMANAT» partııasy Ortalyq apparatynyń qoǵamdyq qabyldaý bólmesiniń meńgerýshisi Álııa Sadyrbaeva ardagerler kótergen suraqtyń el aýmaǵyndaǵy birneshe óńirde qaıtalanyp otyrǵanyn aıtyp, ony Úkimet deńgeıinde qaraýǵa jol ashylatynyn jetkizdi.
«Ardager mártebesine qatysty usynystar birneshe óńirde júıeli túrde kóterilý ústinde. Bul – qoǵam úshin mańyzdy másele. Sondyqtan biz ony nazardan tys qaldyrmaımyz. Májilis depýtattarymen birlesip, Premer-Mınıstrdiń orynbasaryna deıin jetkizýge nıettimiz. Bul – azamattardyń únin joǵary deńgeıge jetkizýdiń naqty joly», – dedi Álııa Sadyrbaeva.
Qoǵamdyq qabyldaýda taǵy bir ózekti taqyryp – balalardyń ádebı tilden alystaýy jáne kórkem ádebıetke qyzyǵýshylyǵynyń tómendeýi boldy. Qala turǵyny Abzal Nusqabaı bul qubylystyń tek bilim sapasyna ǵana emes, ulttyń mádenı negizine de áser etetinin aıtyp, naqty usynystaryn ortaǵa saldy. Onyń sózinshe, oqýshylardyń kópshiligi gadjetke táýeldi, al kórkem ádebıet oqý, jattaý jáne mazmundaý sııaqty daǵdylar mektepte júıeli túrde qalyptaspaǵan.
«Kezinde biz toqsan saıyn keminde bir kitap oqyp, shyǵarmashylyq esep tapsyratynbyz. Jazda da, qysta da taqpaq jattap, mánerlep sóıleýge mashyqtandyq. Bul – til baılyǵymyzǵa, este saqtaý qabiletimizge, oılaý júıemizge úlken áser etti. Qazir mundaı tájirıbe júıeli túrde júrgizilmeıdi», – dedi ol.
Abzal Nusqabaıdyń pikirinshe, ár synypta aptasyna bir ret oqýshylardan jattaǵan taqpaqtaryn aıtý, demalysqa arnaıy kitap tizimin berý jáne úı tapsyrmasyna ertegi mazmunyn aıtý sııaqty elementter oqý prosesine qaıta engizilýi qajet. Bul bastama barlyq mektepterge ortaq ádistemelik nusqaýlyq retinde bekitilýi kerek.
Qabyldaý barysynda barlyq ótinishter tirkelip, jaýapty mekemelerge joldandy. Keıbir máseleler sol jerde jedel sheshimin tapty. Al áleýmettik mártebe, bilim berý jáne zańnamalyq ózgeristerdi talap etetin birqatar suraq respýblıkalyq deńgeıde qaralatyn bolady. Partııa bul bastamalardyń oryndalýyn baqylaýda ustaıdy jáne tıisti memlekettik organdarmen birlese jumys júrgizýge daıyn.
Eske salaıyq, qazaqstandyqtar ózderin tolǵandyrǵan máseleler boıynsha «AMANAT» partııasynyń Ortalyq apparatynyń qoǵamdyq qabyldaý bólmesine kelesi baılanys arnalary arqyly habarlasa alady:
- Sall-ortalyq: 8 800 080 4441 (Qazaqstan boıynsha qońyraý shalý tegin);
- WhatsApp: 8 700 800 4441;
- E-mail: komek@amanatpartiasy.kz.
Qabyldaýǵa jazylý qabyldaý ótkiziletin kúnge deıin keminde 3 kúntizbelik kún buryn júzege asyrylady.
Almaty oblysy.
