Sýretter Baıanaýyl aýdany ákiminiń baspasóz qyzmetinen alyndy
Jalpy aýmaǵy 4,5 myń sharshy metrden asatyn sport ǵımaratynyń ereksheligi kóp. Munda boks, kúres, ústel tennısi, voleıbol, basketbol, jattyǵý zaldary, shaǵyn fýtbol, strıtbol alańdary bar. Buǵan qosa sadaq atýǵa, ıntellektýaldyq oıynǵa arnalǵan, taǵy basqa da zaldar ornalasqan. Eń bastysy, aýdannyń sporttyq ınfraqurylymynda táýelsizdik jyldarynan beri alǵashqy júzý basseıni ashylyp otyr. 25h11 kólemdi, 4 jolaqty basseın kent turǵyndarynyń barlyǵyna qoljetimdi bolady. Onyń qurylysyna zamanǵa saı materıaldar paıdalanylyp, eýropalyq úlgidegi jabdyqtar ornatylǵan. Sý quıylmaly júıemen únemi aınalyp turady. Mundaı basseınder uzaq jylǵa shydaıdy ári sýǵa túsýshilerge barynsha qaýipsiz.
Keshenniń ashylýyna Pavlodar oblysynyń ákimi Asaıyn Baıhanov qatysyp, jergilikti jurtshylyqty kópten kútken ıgilikpen quttyqtady.
– Ulylardyń mekeni, qaımaǵy buzylmaǵan Baıanaýyl jerinde osyndaı tamasha, zamanǵa saı sport kesheni ashylyp otyrǵanyna qýanyshtymyz. Aýdannyń tabıǵaty sulý bolǵanymen, ınfraqurylymyn jańǵyrtýda sheshimin kútken máseleler barshylyq. Sol turǵyda búgingi jańa nysan sol bataly isterdiń bastamasy ǵana. Halqymyzda «Týǵan jerge qamqorlyq – ultqa qamqorlyq», degen qanatty sóz bar. О́ńir bıligi turǵyndarǵa bergen ýádesin árdaıym oryndaıdy. Osydan eki jyl buryn aýdandaǵy jas urpaq ókilderine sport keshenin salyp beremiz dep ýáde etkenbiz. Búgin sonyń nátıjesin kórip otyrmyz. Jańa sport kesheni álemge tanymal sport maıtalmandaryn tárbıelep shyǵarady degen senimdemiz, – dep atap ótti óńir basshysy.
Ámbebap sport kesheni Ertis-Baıan óńirinde tuńǵysh ret ashylyp otyr. Qurylysyna 2,8 mlrd teńge qarajat jumsalǵan.
– Mundaı áleýmettik mańyzdy jobany aýdan halqy uzaq jyl kútken edi. О́ıtkeni buqaralyq sportty damytyp, halyqty salamatty ómir saltyna baýlıtyn múmkindikter az boldy. Osy olqylyqtyń ornyn toltyratyn sport keshenine Baıanaýylǵa kire beristen jer tańdalǵany da qýantady. Sebebi bul aýmaqta sport nysandary joq. Aýdan basynda bir ǵana sport kesheni bar, onyń ózi kúres túrleri men boksqa arnalǵan. Jalpy, sport mektebinde 600-den astam bala shuǵyldansa, endi olardyń qatary taǵy 200 balaǵa kóbeıedi. Sýda júzý, voleıbol, basketbol, shaǵyn fýtbol, sadaq atý seksııalary jumys isteı bastaıdy. Buǵan deıin voleıbolshylarymyz shaǵyn zalda jattyǵyp júrgen. Olardyń arasynda bes jasóspirim elimizdiń chempıony. Júzý sportyn damytýǵa da múmkindik týdy. Aýdanda búginde 9 myńnan astam adam (turǵyndardyń 39%-y) sportpen turaqty shuǵyldanady, – deıdi Baıanaýyl aýdany dene shynyqtyrý, sport jáne týrızm bóliminiń basshysy Zeınolla Tálipov.
Qazirde aýdanda 15 sport túrinen úıirme bar. Endi olardyń qatary eselene túsedi. Jergilikti sport mektebi sportqa beıim balalardy 6 jasynan qabyldaı beredi.
Pavlodar oblysy
