«Oblystyń geografııalyq jaǵynan yńǵaıly ornalasýy, temirjol, avtomobıl joldary jáne halyqaralyq áýejaı Qyzylordany elimizdiń iri logıstıkalyq jáne óndiristik ortalyǵyna aınaldyrýǵa tolyq múmkindik beredi. AEA aýmaǵy – 550 gektar. Qorqyt ata áýejaıynyń qasynan oryn tebedi. Onyń 50 gektary avıasııaǵa qyzmet kórsetý aımaǵy bolsa, 100 gektary kóterme-bólshek saýda, qoıma jáne saqtaý aımaǵyna arnalady. Qalǵany ónerkásiptik aımaq sanalady. Qazir AEA tıimdi jumys isteýin qamtamasyz etý úshin 28 negizgi ekonomıkalyq qyzmet túrleri kelisildi», deıdi oblystyq kásipkerlik jáne ónerkásip basqarmasynyń basshysy Dáýren Ábilqaıyrov.
AEA-da qurylys ındýstrııasy, jeńil ónerkásip, mashına jasaý, kólik-logıstıka, tehnologııa men ınnovasııa salasyndaǵy ınvestısııalyq jobalardy júzege asyrý josparlanǵan. О́nerkásiptik aımaqtan jún jáne teri óńdeý, kıim óndirisi, toqylmaǵan materıal óndirisi de oryn teppek. Qurylys ındýstrııasyn damytatyn shynyplastık armatýra, polımerli, armatýralanǵan qubyr óndirisi, fıbrosement buıymdaryn jáne avtoklavty gazbeton óndiretin zaýyt salý josparlanyp otyr.
Jýyrda qytaılyq kompanııamen «Sılıkatty-kalsılengen taqtaısha» shyǵarý úshin memorandýmǵa qol qoıyldy. Aımaqta ornalasatyn alǵashqy joba da osy óndiris orny bolmaq. О́ńir basshylyǵynyń shet memleketterge jasaǵan jumys saparlarynyń nátıjesinde qazir syrttan kelip, aımaq ekonomıkasyn zerttep jatqan kompanııalar kóp. Olardyń arasynda Qytaı iskerlerinen bólek Eýropa bıznesmenderi de bar.
AEA qatysýshylaryna birqatar salyq jáne keden jeńildigi usynylady. Olar korporatıvtik tabys salyǵynan, AEA aýmaǵyna ótkiziletin taýarlarǵa qosylǵan qun salyǵynan, kedendik baj ben jer jáne múlik salyǵynan, jer ýchaskesin paıdalanǵany úshin tólemaqydan bosatylady. Sonymen qatar kvotalardan tys sheteldik jumys kúshin tartýda jeńildikter de qarastyrylǵan.
Elimizde AEA jumysynyń uzaqtyǵy – 25 jyl. Bul merzimdi uzartýǵa da múmkindik bar. AEA aýmaǵynda jer qoınaýyn paıdalaný, aksızdeletin taýar óndirý, oıyn bıznesi salasyndaǵy jobalardy iske asyrýǵa bolmaıdy. Basqarma basshysynyń aıtýynsha, jer alý úshin ınvestor qujattar tizbesine saı basqarýshy kompanııaǵa ótinim beredi. Al «QazIndustry» AQ biryńǵaı úılestirý ortalyǵy retinde ınvestordy qatysýshy retinde tirkeıdi. Oblystyń ekonomıkalyq damýyna serpin beretin strategııalyq joba osylaı júzege asyryla bastaıdy. 3 000-nan astam jańa jumys orny qurylatyn AEA-nyń josparlanǵan ekonomıkalyq kórsetkishke jetýi qadaǵalanady.
«Arnaıy ekonomıkalyq aımaǵy kóp Polsha qazir iri otandyq jáne sheteldik ınvestısııa tartý, jańa óndiriske jol ashý, eksporttyq jáne kóliktik áleýetti kúsheıtý baǵytynda alda tur. Biz osy memlekettiń, óz elimizde qurylǵan basqa da AEA tájirıbelerin zerttedik. Polshalyq mamandar keńesine júgindik. Osy arqyly Syr óńirin elimizdiń logıstıkalyq jáne óndiristik kartasynda jetekshi orynǵa shyǵaramyz degen úmit bar», deıdi basqarma basshysy.
Qyzylorda
