Elimizdiń quramasy qazirgi kezde daıyndyqty qyzý júrgizip jatyr. Ulttyq quramanyń bas bapkeri Qaırat Sátjanov Astananyń sharshy alańyna myna shákirtterin shyǵarýdy jón kórdi: 50 kg – Sanjar Táshkenbaı, 55 kg – Mahmud Sabyrhan, 60 kg – Serik Temirjanov, 65 kg – Ertýǵan Zeınýllınov, 70 kg – Abylaıhan Júsipov, 75 kg – Sabyrjan Aqkalyqov, 80 kg – Nurbek Oralbaı, 85 kg – Bekzat Nurdáýletov, 90 kg – Saǵyndyq Toǵambaı, + 90 kg – Aıbek Oralbaı.
Atalǵan bylǵary qolǵap sheberleriniń barlyǵy da búgingi tańdaǵy eń úzdik sportshylar. Quramada tek ataqty Sáken Bıbosynov pen Aslan Shymbergenov, jas daryn Tórehan Sabyrhan ǵana joq. Olardyń ne sebepti bas komandanyń sapyna enbeı qalǵany belgisiz. Qalǵandarynyń tórt kózi túgel. Nurbek Oralbaı Parıj Olımpıadasynyń kúmis júldegeri, 2023 jylǵy álem chempıony. Sanjar Táshkenbaı, Mahmud Sabyrhan, Bekzat Nurdáýletov kezinde tórtkúl dúnıeniń teńdessizi dep tanylǵan. Bekzat bul ataqqa 2019 jyly Ekaterınbýrgte qol jetkizse, Sanjar men Mahmud 2023 jyly Tashkentte top jardy. Abylaıhan Olımpııa oıyndaryna eki ret qatysyp, álem chempıonatynda úsh ret qola medaldy oljalaǵan saqa sportshy. Serik osydan tórt jyl buryn Belgradtaǵy baıraqty básekede úzdik úshtikti túıindedi. Aıbektiń Azııanyń eki dúrkin chempıony degen ataǵy bar. Ertýǵan men Saǵyndyq Azııa oıyndarynyń qola júldegerleri. Sabyrjan jastar arasyndaǵy álem birinshiliginiń jeńimapazy, Azııa chempıonatynyń (U-20) fınalısi.
Elimizdiń quramasy sapyna osyndaı talaı dúrmekten ótip, kóptegen dúbirli dodada ábden ysylǵan dúldúlder enip otyr. Olaı bolsa, óz jankúıerlerimizdiń kóz aldynda ótetin Álem kýboginde qazaqtyń jampoz jigitteri ózderiniń myqtylyǵyn túbegeıli moıyndatýǵa tıis.
Bıylǵy jyldyń sáýir aıynda Brazılııada ótken Álem kýboginiń tusaýkeserinde elimizdiń erler quramasy eki altyn, bir qola medal ıelendi. Nursultan Altynbek (55 kg) pen Dáýlet Tólemisov (85 kg) top jaryp, Dıas Moljigitov (80 kg) qolaǵa qol jetkizdi. Jalpy esepte jerlesteterimiz О́zbekstan (5 altyn+2 kúmis+1 qola) men rıng qojaıyndarynan (2+2+1) qalyp qoıdy. Ekinshi kezeń Polshada uıymdastyryldy. Varshavada da ózbekter (6+1+2) aldyna jan salmady. Ekinshi, úshinshi oryndarda – jarys qojaıyndary (5+3+10) men Italııa (3+3+1). Bul jarysqa elimizdiń boksshylary qatysqan joq.
