foto: gov.kz
Ulttyq biryńǵaı testileýde eń joǵary nátıje kórsetken talapker Túrkistan oblysy, Ordabasy aýdanyndaǵy mekteptiń túlegi boldy. Ǵylym jáne joǵary bilim mınıstri Saıasat Nurbek talapker Jánibek Ábilhandy jetistigimen quttyqtap, ata-anasyna alǵys bildirdi. Kezdesý barysynda mınıstr oǵan alǵys hat pen estelik syılyq tabystady.
Kezdesý aıasynda Saıasat Nurbek elimizdegi joǵary bilim berý salasynyń múmkindikterine, sondaı-aq Qazaqstanda ashylǵan sheteldik ýnıversıtetterdiń áleýetine toqtaldy.
«Biz qarapaıym aýyl mektebiniń túlegi eń joǵary ball jınaǵanyna erekshe qýanamyz. Memleket tarapynan onyń bilimin ári qaraı damytýyna tolyq qoldaý kórsetiledi. Búginde Qazaqstan óńirlik akademııalyq hab retinde qalyptasyp keledi. Elde qurylǵan bilim berý ekojúıesi halyqaralyq seriktesterdiń qyzyǵýshylyǵyn arttyryp jatyr. Jetekshi sheteldik ýnıversıtettermen birlese otyryp, jańa bilim berý baǵdarlamalary júzege asyrylýda. Bul jetistikter Qazaqstannyń bilim berý júıesiniń halyqaralyq deńgeıde moıyndalǵanyn kórsetedi», dedi mınıstr.
Aıta keteıik, Jánibek Ábilhan 19 mamyr kúni Shymkent qalasyndaǵy aımaqtyq testileý ortalyǵynda «Matematıka–Informatıka» pánder kombınasııasy boıynsha synaq tapsyryp, eń joǵary kórsetkishke qol jetkizdi. Bul — onyń Astanaǵa alǵash kelýi. Ol elordadaǵy birneshe joǵary oqý ornyn aralap, oqý ınfraqurylymymen tanysty.
