Tarazda ótken jyly bastalǵan negizgi kóshelerdiń jolyn jóndeý, jańadan jol salý jumysy bıyl da qarqyndy jalǵasyn taýyp jatyr. «Jol azabyn tartýdaı-aq tartyp keldik. Bizge qashan jol salynady?» dep áldeneshe jyl boıy jergilikti atqarýshy bılikke bazynasyn aıtqan tarazdyq áleýmettiń ótinishin shahar basshysy jiti nazarda ustap otyr.
Ásirese elimizdegi eń úlken shaǵyn aýdan sanatyna engen «Uly dala» shaǵyn aýdanynyń mańyndaǵy «Býryl» turǵyn alabynda qonystanǵan turǵyndar ótinishi qanaǵattandyrylyp, birneshe kóshege jańa asfalt salynǵanyna halyq rıza.
Qala bıligi keltirgen derekke júginsek, oblys ortalyǵyndaǵy jol jóndeý jobalarynyń sany ótken jylǵy derekpen salystyrǵanda eki esege deıin artqan. Bul rette, halyq suranysyna oraı, oblys ortalyǵyndaǵy negizgi kóshelerdiń jolyn qalpyna keltirýge basymdyq berilip otyr.
Jalpy, Jambyl oblysyndaǵy jergilikti mańyzy bar avtojoldar men eldi meken kóshelerin jóndeýge qazynadan 28 mlrd teńge qarastyrylǵan, onyń edáýir bóligi oblys ortalyǵyna baǵyttalǵan.
«Bıyl jalpy uzyndyǵy 61,4 shaqyrymdy quraıtyn 95 kóshe, burylys, tuıyq, ótkelge ortasha jóndeý jumysyn júrgizý josparlanǵan. Budan bólek, 100 kóshege, 20 turǵyn alabyna shaǵal tóselip, jalpy uzyndyǵy 35,3 shaqyrymdy quraıtyn jaıaý júrginshiler joly jóndeledi. Osylaısha, jergilikti halyqtyń suranysyn qanaǵattandyrýǵa den qoıyp otyrmyz. Jumysty halyq talap-tilek etkendeı, barynsha sapaly atqarýǵa nıettimiz», deıdi Taraz qalasy ákiminiń orynbasary Nursultan Isabekov.
Baqytjan Orynbekov Taraz qalasynyń ákimi qyzmetine taǵaıyndalǵannan keıin BAQ ókilderimen júzdesip, oblys ortalyǵyndaǵy kóshe joldaryn qalpyna keltirý baǵytynda qoldan kelgenshe qyzmet atqaratynyn málim etken edi. Shahar basshysy «Býryl» turǵyn alabyndaǵy kóshelerge jańadan jol salýǵa yqpal etý arqyly jergilikti halyqtyń negizgi máselesin sheshýge basymdyq berip otyrǵanyn dáleldedi. «Býryl» turǵyn alaby «Uly dala» shaǵyn aýdanymen qaptaldasyp jatqanyn, munda birneshe qoǵamdyq kólik qatynaıtynyn eskersek, qala ákiminiń bul qadamy, rasynda da, kóńil qýantady.
«Oblys ortalyǵyndaǵy 37 kóshe, burylys, tuıyqtar men ótkelderde jol jóndeý josparǵa sáıkes qarqyndy júrgizilip jatyr. Máselen, «Býryl A, B, V» turǵyn alabyndaǵy jalpy uzyndyǵy 33,2 shaqyrymdy quraıtyn 75 kóshege asfalt jabyndysyn tóseý qarastyrylǵan bolsa, qazirge deıin 61 kóshede jumys aıaqtalǵan. Qalǵan 14 kóshege de jol tóseledi», deıdi qala ákiminiń orynbasary.
Tarazdaǵy jol jóndeý jumysy jergilikti halyqtyń kóńilinen shyǵyp otyr. Shahar turǵyndary jyldar boıy aıtylǵan ózekti máseleniń der kezinde ońynan sheshilip jatqanyna qýanyshty. Sol rette qarqyndy júrgizilip jatqan jumys toqtamasa eken dep tileıdi.
«Biraz jyl boıy aıtylyp kelgen kókeıkesti másele sheshimin taýyp jatyr. Kósheler jaryqtandyrylǵan, aýyzsý máselesi sheshilgen. Endi, mine, qala ákimdigi bergen ýádesin oryndap, kóshelerge asfalt tósep jatyr. Jol azabyn jyldar boıy bir kisideı sezindik. Turǵyndar talaı ret kótergen ózekti máseleniń ońynan sheshilgenine, jalpy alǵanda, oblys ortalyǵynda atqarylyp jatqan jumystarǵa jergilikti jurt dán rıza», deıdi Taraz qalasynyń turǵyny, ardager Baqyt Samyratbekov.
Rasynda da, keıingi birneshe jylda oblys ortalyǵynda kóshe joldaryn jóndeý, jańadan jol salý, kóshelerdi jaryqtandyrý jumysy joǵary qarqynda júrgizilip jatyr. Shahar basshysynyń eki jyl buryn bergen ýádesin ýaqtyly oryndap jatqany kóńil toǵaıtady.
Taraz
