Bylaı qarasaq, polısııanyń mindeti kóp, sharýasy shashetekten. Ýchaskelik polısııadan bastap, keńsede otyratyn bastyqtarynyń ózi únemi shapqylap júredi. Ásirese jergilikti polısııa qyzmetiniń jumysy kúrdeli. Qoǵam men jol qaýipsizdigine qatysty barlyq profılaktıkalyq is-shara, oqıǵa men qylmystyq iske jaýapty. Ertis-Baıan óńirindegi osy bir tolassyz tirlikti uıymdastyryp, úılestirý oblystyq jergilikti polısııa qyzmeti bastyǵynyń mindetin atqarýshy, polısııa maıory Azamat Kúrkebaevtyń enshisinde. Eńbek joly qatardaǵy ýchaskelik polıseıden bastalǵan tártip saqshysy alǵyrlyǵy, qyzmetine degen adaldyǵynyń nátıjesinde búginde bútin bir oblystyń qoǵamdyq tártibin qadaǵalap otyr.
«Ár polıseıdiń mindeti – antyna adal bolý, Otanyna qyzmet etý. Ádette qatardaǵy polıseılerdiń qyzmeti shym-shytyryqqa toly. Sebebi bul jerde jurtpen etene jumys isteısiń. Sonysymen de qyzyq. Qaýipti qubylystyń, yqtımal qylmystardyń aldyn alýǵa umtylasyń. Bylaıǵy kópshilik bile bermes, qoǵamda tártip saqshylarynyń qatysýymen kúnine júzdegen qylmystyń aldy alynady. Qoǵam tártibin qadaǵalaý, qylmystyń aldyn alý, jurtty zańǵa baǵynýǵa úıretý kún tártibinen túspeıdi», deıdi ol.
«Ákege qarap ul óser» degendeı, Azamat Maratjanuly – jaqsy ákeniń tálimin alǵan jan. Ata-anasy balalarynyń barlyǵyn oqytyp, adal eńbekke úıretkenin, al polıseı mamandyǵyn tańdaýyna naǵashy jurtynda buryn ishki ister salasynyń qyzmetkerleri bolǵany sebepker ekenin jetkizdi. Ákesi úıde tártipti únemi alǵa qoıǵannan ba, uly kishkentaıynan tártipsúıgish bolyp jetilgen. О́se kele mamandyqqa adal bolýdyń negizgi faktory da tártipke baǵyný ekenin uqqandaı.
«Polıseıler tártiptiń etalony bolýy kerek. Bul – qaǵıda ǵana emes, adamnyń ishki jan dúnıesimen baılanysyp jatatyn oı-óris. Ishki ister salasynda eńbek etip júrgen azamattar psıhologııalyq turǵydan myǵym bolmasa, uzaqqa shydamaıdy, tolassyz tirlikten kúıip ketedi. Oǵan talaı márte kýá boldyq. Al jyldar boıy jınaǵan tájirıbe bizdi damytyp qana qoımaıdy, jurtpen jumys isteýde jańashyldyq engizýge túrtki bolady. Pavlodar oblysy elimizdegi eń qaýipsiz óńirdiń biri dep maqtanyshpen aıtýǵa laıyqty. Kópshilik táýliktiń kez kelgen ýaqytynda Ertis ózeni jaǵasynda, kósheler men saıabaqtarda emin-erkin serýendep, ózin qaýipsiz sezine alady. Mundaı qaýipsiz atmosferany ustap turý úshin polıseıler kún saıyn tynymsyz eńbek etip júr», dep keıipkerimiz áńgimesin jalǵaı tústi.
Azamat Kúrkebaev Ekibastuzda ýchaskelik polıseı, vzvod, rota komandıri bolyp eńbek etip júrgen shaǵynda aldyńǵy qatardaǵy qyzmetkerlerdiń biri bolǵanyn da atap ótpeske bolmas. Ásirese kóshede meıirbıke áıeldiń qolsómkesin urlap qashqan tonaýshyny 10 mınýt ishinde ustap, qylmysty izin sýytpaı ashqany týraly aqparat bir jyldary áleýmettik jelide tanymal bolǵan. Jol qaýipsizdigine qaýip tóndirgen mas júrgizýshilerdiń talaıyn quryqtap, balkonnan sekirgeli turǵan azamattardy qutqaryp qaldy.
Sóz sońynda Ishki ister mınıstrligi jergilikti polısııa qyzmeti men ákimshilik polısııa basqarmasyn qaıta uıymdastyryp, olardyń bazasynda eki jańa basqarma – quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý basqarmalaryn qurǵaly otyrǵanyn oń bastama retinde qoldaıtynyn jetkizdi.
«Adamdar erejelerdi saqtap, tártipke baǵynsa, kólik júrgizýshileri qaýipsizdik belbeýin taǵyp, jyldamdyqty asyrmasa, tártiptiń saqtalýy degen sol. Iаǵnı kez kelgen quqyqbuzýshylyqtyń aldyn alý úshin qoǵamdaǵy tártiptik sanany kúsheıtýge mán berýimiz kerek. Aldyn alý is-sharalarynyń mańyzy da soǵan saıady. Adam kez kelgen ortada ózin qaýipsiz sezine alsa, ol – quqyqtyq memlekettiń ıgiligi», dep támamdady sózin.
Azamat Maratjanuly búginde zaıyby ekeýi otbasynda bir ul, bir qyz tárbıelep otyr.
Pavlodar oblysy
