«Kókmaısa-2025» festıvali – ulttyq bolmysty dáripteıtin taǵylymdy mereke ǵana emes, sonymen qatar óńirlik kásipkerlik pen týrızmdi damytýǵa serpin beretin tıimdi mádenı-kópshilik ınfraqurylym bola alady.
Festıval «Qymyzmuryndyq» atty teatrlandyrylǵan kórinispen bastalyp, «Joshy» etno-folklorlyq ansambliniń tól týyndylarymen jalǵasty. Ashylý saltanatynda sóz sóılegen Ulytaý oblysynyń ákimi Dastan Ryspekov jınalǵan jurtshylyqty merekemen quttyqtap, ulttyq rýh pen mádenı muranyń urpaq sabaqtastyǵyndaǵy mańyzyna erekshe toqtaldy.
Festıval aıasynda bıe baılaý, kúbi ystaý, qymyz ashytý kórinisteri kópshilik nazaryna usynylyp, arnaıy daıyndalǵan qymyz kelgen qonaqtarǵa tegin taratyldy. Et jeý jarysy, qazaqsha kúres, jilik syndyrý, sadaq atý, naıza laqtyrý, asyq atý, qoshqar kóterý sekildi ulttyq jarystar uıymdastyryldy. Saıystarda jergilikti sportshylardan ózge, kórshiles Qaraǵandy, Qyzylorda, Qostanaı oblystarynyń sportshylary da baq synady.
О́ńirlik jáne jergilikti qolóner sheberleri ulttyq buıymdardy jasap kórsetý arqyly kelýshilerge sheberlik sabaqtaryn ótkizdi.
Sonymen qatar, balalarǵa arnalǵan etnooıyn alańdary men ulttyq stıldegi attraksıondar qyzyqty ári tanymdyq formatta usynyldy. Ulttyq kıim úlgileri men dástúrli turmystyq jabdyqtardyń kórmesi ótti.
Sahnada elimizge tanymal óner ıeleri men jergilikti shyǵarmashylyq ujymdar óner kórsetti. Olardyń qatarynda: Beksultan Baraqbaı, Aqjol Ámirhan, Dilnaz Sultanbaı, «Sáken serileri», «Tandem» dýeti, Qaıyrhan Erǵazy, Elmıra Dáýletbaeva, Dosymjan Tańatarov, Ulytaý aýdandyq mádenıet úıiniń bı ansambli, «Altyn Orda» ult aspaptar ansambli, «Kenshiler sazy» folklorlyq ansambli bar.
Festıval sońynda ótkizilgen ulttyq sport baıqaýlardyń jeńimpazdaryna dıplomdar men arnaıy syılyqtar tabystaldy.
«Kókmaısa-2025» – bul salt-dástúr men zamanaýı mádenıetti bir arnaǵa toǵystyryp, ult bolmysynyń tereń tamyryn sezinýge múmkindik beretin taǵylymdy mereke.
