«Qazaqstanda esirtki óndirgeni úshin beriletin jaza qatańdatyldy. Tipti, ómir boıy bas bostandyǵynan aıyrylýy múmkin. Biraq bul saladaǵy jumys áli de tolyǵymen bitken joq, túıtkilder jetkilikti, sheshilmegen máseleler elimizdiń qaýipsizdigine, turaqtylyǵyna syn-qater tóndirýde. Búkil qoǵamdy alańdatyp otyrǵan eń qaýipti úrdis: jastar nashaqorlyqqa úıir bola bastady. Bul – úlken qater, ony jasyrmaýymyz kerek», dedi Prezıdent quqyq qorǵaý organdarynyń keńeıtilgen alqa májilisinde.
Memleket basshysynyń aıtýynsha, Qazaqstanda kiristi jylystatýǵa jáne terrorızmdi qarjylandyrýǵa qarsy kúrestiń halyqaralyq ozyq standarttarǵa saı tıimdi júıesi qalyptasty. 2019 jyldan beri JIО́-degi kóleńkeli ekonomıkanyń úlesi 23 paıyzdan 16 paıyzǵa deıin tómendedi. Biraq áli joǵary deńgeı saqtalyp otyr. Memleket jaýapkershiligi mol ári adal kásipkerlerdi qorǵap, qoldaý bildiredi.
«Meniń arnaıy tapsyrmam boıynsha Bas prokýratýra jalpy somasy 34 trıllıon teńge bolatyn sheteldikterdiń qatysy bar júzdegen ınfraqurylymdyq jobaǵa quqyqtyq turǵydan kómek kórsetip keledi. Alaıda otandyq bıznesti negizsiz qylmystyq qýdalaý máselesi tolyq sheshimin tapqan joq. Bas prokýratýra bul jumysty jalǵastyrǵany jón», dedi el Prezıdenti.
