«Týǵan jerge týyńdy tik» ınvestısııalyq forýmy qarsańynda qalanyń avtobýs parki sý jańa avtobýstarmen tolyqty. Jańadan alynǵan 44 avtobýs №24, №4, №35 jáne №12 baǵyttarda jolaýshy tasymaldaýǵa maýsym aıynyń sońynda kirisedi. Qazir qala aýmaǵynda 42 marshrýt jumys isteıdi. Oǵan 331 avtobýs tartylǵan. Oblys ortalyǵynda 5 tasymaldaýshy jolaýshylarǵa qyzmet kórsetedi, degenmen Semeıdiń avtobýs parki keıingi 6 jylda jańarmaǵan, jańa avtobýstar alynbaǵan.
Oblys ákimdiginiń qoldaýymen «Avto Trans Semeı» JShS Semeıde jasalǵan 44 jańa avtobýsty satyp alyp, qalanyń kólik júıesin jańartty. Jańa kólikter qala turǵyndaryna jaıly salqyndatý júıesimen jabdyqtalǵan. Endi Semeı jurty alǵash ret salqyndatqyshy bar avtobýstarmen júretin bolady.
Aımaq basshysy alda qala avtobýsy kezeń-kezeńimen jańartylyp, jumystardyń júıeli júretini nazarda bolatynyn aıtty.
– Osydan bir aı buryn oblystyń damý josparyn tanystyrǵan kezde qalanyń avtobýs parkin jańartamyz dep ýáde bergenbiz. Mine, endi 44 avtobýsty qalaǵa jibergeli turmyz. Onyń 30-y úlken, 14-i shaǵyn avtobýstar. Bári de ózimizdiń Semeıde shyǵarylǵan. Sapaly, básekege saı avtobýstar. Bul avtobýstarǵa basqa oblystar da qyzyǵýshylyq tanytyp, suranysqa ıe bolyp otyr. Biraq avtobýs shyǵaratyn zaýyttyń basshylyǵy birinshi bolyp bizge osyndaı múmkindik týǵyzdy, – dedi oblys ákimi Berik Ýálı.
Transporttyń taǵy bir ereksheligi, Abaıdyń 180 jyldyǵyna oraı, avtobýstardyń syrty uly aqyn beınesi bar logotıppen bezendirilgen. Ákimniń aıtýynsha, jyl sońyna deıin qaladaǵy jańa avtobýstyń sany 70-ke jetip, keler jylǵa taǵy da 50 avtobýs halyq ıgiline jaramaq.
Abaı oblysy
