Batys Qazaqstanda ekologııalyq keleńsizdikterge jol berilgen

ORAL. 15 aqpan. Memlekettik qyzmet isteri jáne sybaılas jemqorlyqqa qarsy is-qımyl agenttigi Batys Qazaqstan oblysy boıynsha ekologııa departamentiniń basshysy Qabıjan Qapanov pen bas memlekettik ekologııalyq ınspektor Erlan Saparovty qyzmetinen bosatý týraly usynys jasady. Bul týraly egemen.kz tilshisi habarlady. Batys Qazaqstan oblystyq prokýratýrasy 2010-2012 jyldary «OralOılEndGaz» kásiporny burǵylaǵan jerden «MunaıAvtoTrans» jáne «BatysTabıǵat» JShS munaı qaldyqtaryn tasyǵanyn anyqtady. Osy áreketteri arqyly olar Zelenov aýdany aýmaǵyn lastaǵan. Sonyń saldarynan mıllıard teńgege taıaý zııan keltirilgen. Osy ekologııalyq qylmysty jasaǵany úshin alǵashqy atalǵan kásiporynnyń dırektory Aslan Muqanov sottalǵan. Alaıda, oǵan kezinde ekologııa departamenti eshqandaı shara kórmegen. Osyǵan uqsas oqıǵalardyń budan keıin de birneshe ret qaıtalanǵany belgili bolǵan. Áıtse de ekologııa departamenti júrdim-bardym qaraǵan. Sodan keıin aýa men qorshaǵan ortany lastaýshylar oılaryna kelgenin istep, emin-erkin taırańdaı bastaǵan. Osyndaı «jalpaqshesheıliktiń» saldarynan ótken jyly KPO b.v kenishinde 1,2 mıllıon tekshe metr kólemindegi gazdy zańsyz jaǵýdyń 106 deregi oryn alǵan. Taǵy bir kózjumbaılyqtyń syry tómendegideı. О́tken 2014 jyly qarashanyń aıaq kezinde Qarashyǵanaq kenishine taıaý ornalasqan Berezovka aýyly aýmaǵynda aýadaǵy kúkirtsýtegi men benzoldyń mólsheri tıisti normadan áldeqaıda kóp bolǵan. Ony «Gang» apparaty anyqtaǵan. Alaıda, sol tusta osy kúrt aýytqýshylyqty ekologııalyq monıtorıng stansasy kórsetpegen. Sol kúnderi Berezovka turǵyndarynyń jappaı ýlanǵany belgili bolǵan. Ekologııa departamenti jetekshileri mundaı salǵyrttyq oryn alǵan oqıǵaǵa baılanysty qozǵalǵan isti tergeý men anyqtaýǵa kedergi keltirgen. Qysqasy, prokýratýra organdary anyqtaǵan derekterge súıensek, zańdy tulǵalar qorshaǵan ortaǵa orasan zor zııan tıgizgen. Atap aıtqanda, mıllırdtaǵan jáne mılıondaǵan teńge shyǵyn keltirgen kásiporyndardyń qatarynda KPO b.v sheteldik kompanııasy, «OralOılEndGaz», «MunaıAvtoTrans» jáne «BatysTabıǵat» JShS bar. Áıtse de, ekologııa departamenti basshylary osy óreskel jáıtterge oraı ekologııalyq aýdıt júrgizý týraly sheshim qabyldamaǵan. Sonyń saldarynan jer qoınaýyn paıdalanýshylardan bıýdjetke mıllıardtaǵan teńge kólemindegi salyqtyq tólemder túspeı qalǵan. Temir Qusaıyn. Derek: egemen.kz. Sýret: krasproc.ru.