Sarapshylar mundaı bıik mejege sıfrly sheshimdersiz jete almaımyz degen pikirde. Qarqyn alyp kele jatqan týrızmniń bolashaǵyn sıfrly tehnologııalarmen baılanystyrǵan sala oıynshylary Almatyda «Qazaqstandaǵy sıfrlyq týrızm – 2025» forýmyn ótkizip, sıfrlandyrý men ınnovasııalyq bolashaǵyn talqylady.
– Úkimettiń sońǵy otyrysynda týrızmdi sıfrlandyrý máselesine erekshe nazar aýdaryldy. Bul osy baǵyttyń memlekettik deńgeıde basymdyqqa ıe ekenin kórsetedi. Búginde Qazaqstanda segiz tilde qoljetimdi Kazakhstan.travel týrıstik portaly, áýejaılarda QR-kod júıesi jáne eQonaq qonaqtardy tirkeý platformasy jumys isteıdi. Alaıda týrıstiń sıfrly joly tolyq qalyptaspaı otyr. Bul uıaly baılanys operatorlary men elektrondyq tólem júıeleri sekildi jańa derekkózderdi biriktirý qajettigin kórsetedi. Mundaı keshendi tásil týrıster men sala ókilderi úshin ashyq ári yńǵaıly sıfrly orta qurýǵa múmkindik beredi, – dedi forým barysynda Týrızm jáne sport mınıstriniń orynbasary Erjan Erkinbaev.
«Kazakh Tourism» UK» AQ basqarma tóraǵasynyń orynbasary Danıel Serjanulynyń aıtýynsha, týrızmdi damytýǵa elimizdiń geografııalyq, ekonomıkalyq múmkinshiligi jetedi. Ol úshin salany sırflandyra otyryp, aldyńǵy qatarly týrıstik elder tájirıbesine mán berý qajet.
– Búginde álemdegi týrıstik uıymdardyń qyzmeti ashyq. Ispanııa, Dýbaı, Shveısarııa, Túrkııa sııaqty aldyńǵy qatarly týrıstik elderdiń uıymdarymen tájirıbe almasý dástúri qalyptasty. Jaqynda Dýbaıdyń sıfrlyq ári qarjylandyrý júıesimen tanystyq. Sıfrly resýrstardyń jaqsarýy monetızasııaǵa, týrıstik kompanııalar úshin qosymsha tabys tabýǵa múmkindik beredi. Elimizdiń jaǵdaıyna beıimdeýge bolatyn jobalardy engizý basty nazarda tur. Qarastyra kelgende, mysaly AQSh pen Kanadanyń ulttyq parkterdi damytý tájirıbesiniń tartymdy ekenin kórdik. Bul elderde mundaı týrıstik aýmaqtarǵa kirýdiń ózindik tártibi men shegi qalyptasqan. Týrısterge sıfrly sheshimder arqyly qolaıly jaǵdaı jasaı otyryp, tabıǵatty aıalaý, ekologııany jaqsartý máselesine de kóńil bólingen. Bul baǵyt elimizde endi-endi damyp keledi. Al týrısterdi kóptep tartý ınfraqurylymǵa tikeleı táýeldi. Elimizde negizgi bazalyq ınfraqurylym qurylǵannan beri sońǵy jyldary ulttyq parkterge 2,8 mln adam barǵan. Byltyr 2,4 mln-dy qurasa, kórsetkish jyl saıyn 20 paıyzǵa ósip keledi. Keler jyly 3 mln-nan asady degen boljam bar. Bul qyzmetti retteý úshin sapar ortalyqtarynyń jumysy, marshrýttar tizbesi, týrısterdiń qaýipsizdigine mán berilýi qajet. Munyń barlyǵyn sıfrlyq tehnologııalar arqyly júıeleýge bolady. Koreıanyń qala týrızmi júıesinde bir ǵana qosymsha arqyly barlyq servısterge qoljetimdilik bar. Sondyqtan sala oıynshylary týrıstik qyzmet túrlerin tıimdi úılestirýdiń mańyzdy ekenine kóz jetkizýi tıis. Iаǵnı, týrıstik kompanııalardyń biri qyzmetin aýyldy jerlerde qonaq jaılar servısine baǵyttasa, endi biri – qonaq úı, kelesisi sheberlik saǵataryn uıymdastyrýmen aınalysýy qajet, – deıdi D.Serjanuly.
Atap ótkendeı, elimizde qalalyq týrızm qarqyn alyp keledi. Týrısterge kóbine Astana, Almaty, Shymkent qalalary tartymdy. Ekotýrızmge de suranys joǵary. Ekotýrızm etnotýrızmmen birge qarastyrylady. Týrısterdi bul baǵytta qonaq jaılar, aýyl-aımaqtar, salt-dástúrmen baılanysty nysandar, taǵamdar óte qyzyqtyrady. Sońǵy jyldary qarqyn alyp kele jatqan jaǵajaı týrızmi ishten ári syrttan keletin týrısterdi qyzyqtyryp otyr. Mysaly, Aqtaýǵa kóp jaǵdaıda jergilikti jáne reseılik týrıster kóp keledi.
Derekterge súıensek, byltyr elimizge 15 mıllıonnan astam týrıst kelgen. Sheteldik meımandar elimizde kem degende 4 kún turaqtap otyrǵan. TMD elderin kelgen qonaqtardy esepke almaǵanda, Qytaıdan – 655 myń, Úndistannan – 146 myń, Túrkııadan – 130 myń, Germanııadan – 92 myń, Ońtústik Koreıadan kelgen týrıster sany 40 myńǵa jýyqtaıdy. Desek te, sarapshylar elimizdiń týrıstik tartymdy aımaq bolǵanyna qaramastan, qyzmet kórsetý sapasynyń kenjelep qalǵanyn alǵa tartady.
– Qyzmet sapasyn jaqsartý báskelestikke baılanysty. Bizde suranys kóp bolǵanymen, usynys az. Kóptegen qonaq úıler men basqa da qyzmet kórsetý ortalyqtary kóp jaǵdaıda týrıstiń kóptiginen qyzmet sapasyna mán bermeıdi. Sapany jaqsartý úshin kóbirek ınvestor tartý qajet. Al ınvestor úshin ınfraqurylym men zańnamalyq qoldaý sharalary mańyzdy. Qazirgi kezde zańnama turǵysynan kóptegen máseleler qoldaý taýyp, aldaǵy jyldardan ınfraqurylymdardy damytý úshin arnaıy bıýdjettik baǵdarlama iske asatyn bolady. Ákimdikterge quziret berilip jatyr. Osyǵan oraı jergilikti ákimdikter aýyldan tys mańdardyń ınfraqurylymyna mán bermek. Jol máselesi sheshilse, kásipkerler tarapynan qyzyǵýshylyq týady, nátıjesinde básekelestik artady, – dep atap ótti D.Serjanuly.
Bıyl forýmda birinshi ret startaptardyń baıqaýy uıymdastyrylyp, úzdik jobalar týrısterdiń sıfrly jolyn jaqsartý úshin tańdap alyndy. Baıqaý nátıjesine sáıkes jasandy ıntellekt bazasyndaǵy «Alem» mobıldi gıdi jeńimpaz dep tanylyp, komanda 5 mıllıon teńgege ıe bolsa, ekinshi oryn jáne 3 mıllıon teńge jyljymaıtyn múlikti jalǵa alýdy avtomattandyrýǵa arnalǵan «ApartX» tehnologııalyq platformasynyń enshisine tıdi. Baıqaýdyń júlde qory 10 mıllıon teńgeni qurady. Irikteý kezeńiniń nátıjesinde prototıpteri bar týrızm salasyndaǵy 30-dan astam ınnovasııalyq IT-jobadan 10 perspektıvalyq trevel-startap tańdalyp, aqshalaı syılyqqa ıe boldy. Tartymdy jobalar áleýetti ınvestorlar men seriktesterge tanystyryldy.
Almaty
