Mınıstrdiń aıtýynsha, elimizde JI salasyn damytý úshin aldymen tıisti normatıvtik-quqyqtyq baza men etıkalyq qaǵıdattar qalyptastyrý qajet. Osy oraıda 2025 jylǵa arnalǵan ulttyq standarttaý josparyna sáıkes, alǵashqy tehnıkalyq standarttar engizildi.
«Atap aıtqanda, bul standarttar JI-diń bazalyq termınologııasyn, táýekelderdi basqarý júıesin, bilim ınjenerııasyn jáne arhıtektýralyq negizderin qamtıdy», dedi Jaslan Mádıev.
Mınıstrdiń aıtýynsha, erekshe nazar uǵymdyq negizder men termınologııany naqtylaýǵa arnalǵan standartqa aýdarylyp otyr. Bul qujattar 2025 jyldyń sońyna deıin bekitilýi tıis.
Sonymen qatar, JI týraly zań jobasy da ázirlenip, qazirgi tańda Májiliste qaralyp jatyr. Bul qujat saladaǵy negizgi erejelerdi bekitedi.
«Zań jobasynda ashyqtyq, ádilettilik, qorǵalý, adam quqyqtary men bostandyqtaryna basymdyq berilgen. Sonymen birge, jeke derekter men qupııa aqparatty qorǵaý máselesi de qamtylǵan», dedi mınıstr.
Mınıstr bul zańnyń shekteý emes, kerisinshe ınnovasııany damytý, ınvestısııa tartý jáne JI tehnologııasyn ekonomıkanyń túrli salalaryna engizýge baǵyttalǵanyn atap ótti.
KazLLM – otandyq jasandy ıntellekt negizi
Suhbat barysynda mınıstr otandyq JI tehnologııalary týraly da toqtaldy. KazLLM – Qazaqstanda jasalǵan alǵashqy iri ulttyq tildik model bolyp sanalady. Onyń qurylymy 148 mlrd tokennen turady jáne ol qazaq, orys, aǵylshyn, túrik tilderin qamtıdy.
«KazLLM – qazaq tiline beıimdelgen mátin óńdeý, chat-bot, aýdarma jáne analıtıkalyq platformalar jasaýǵa arnalǵan qýatty negiz. Bul model eldiń IT ekojúıesin nyǵaıtyp, sheteldik balamalarǵa táýeldilikti azaıtady», deıdi Jaslan Mádıev.
Sondaı-aq, SHERKALA, AlemLLM atty taǵy eki úlken tildik modeldiń de jasalǵany aıtyldy. Olar da qazaq tilin qoldaıdy jáne halyqaralyq standarttarǵa saı.
Mınıstrdiń aıtýynsha, alǵashqy tehnıkalyq baǵalaý nátıjeleri boıynsha, bul úsh model qazaq tilindegi mátin generasııasynda sheteldik LLaMA men ChatGPT-den kem emes, keı jaǵdaıda sapasy joǵary ekenin kórsetti.
Modelder jaqyn arada naryqqa usynylady. Olar startaptarǵa, bıznes sektorǵa, JOO-larǵa jáne qarapaıym azamattarǵa qoljetimdi bolady.
