Atyraý oblystyq polısııa departamentiniń baspasóz qyzmeti usynǵan derekke súıensek, munaıly óńir jasóspirim-deri ótken jylǵy 3 aıda 14 qylmys jasaǵan. Al bıylǵy osy kezeńde kámeletke tolmaǵandar tarapynan 31 qylmys tirkeldi. Jasóspirimderdiń 3 túrli qylmysty jıi jasaýǵa beıimdigi anyqtalypty. Bul – urlyq, buzaqylyq jáne tonaý.
Keıingi bir jylda Atyraý oblysynda ınternet-alaıaqtyq qylmysy kóbeıgeni baıqalǵan. Polısııa qyzmetkerleri munyń sebebin úsh jaıtpen baılanystyrady. Birinshiden, turǵyndar qarjylyq saýatyn arttyrýǵa mán bermeıdi. Ekinshiden, sıfrlyq saýattyń tómendigi de alaıaqtarǵa tıimdi bolyp otyr. Úshinshiden, munaıly óńirdegi tabys deńgeıiniń joǵary bolǵany alaıaqtardyń qyzyǵýshylyǵyn týdyrady.
«Qazir ınternet-alaıaqtyqqa qarsy úshin aldyn alý is-sharalary udaıy júrgiziledi. Osy oraıda polısııa departamenti men 109 call-ortalyǵy arasynda birlesken is-sharalar týraly memorandým jasaldy. Barlyq ekinshi deńgeıdegi bankke ishki ister organymen alaıaqtyq tranzaksııalar týraly aqparat almasýǵa jol ashqan «Antıfrod-ortalyq» onlaın platformasy iske qosyldy. Bul platformamen ınternet-alaıaqtar jasaǵan qylmystar, jábirlenýshilerden aýdarylǵan qarjynyń kimniń esepshotyna túskeni tez anyqtalady. Qarjyny alýshynyń esepshotyn buǵattaý úshin «Antıfrod-ortalyq» platformasynda usynystar joldandy. Mundaı is-sharalar ınternet-alaıaqtardyń zańsyz áreketin jedel áshkereleýge, jábirlenýshiniń qarjysyn qaıtarýǵa múmkindik beredi», dep aqparat berdi baspasóz qyzmeti.
Osyndaı aldyn alý is-sharalaryna qaramastan alaıaqtardyń zańsyz áreketi jıi qaıtalanatyn qylmystyń birine aınalyp otyr. Ásirese ınternet-alaıaqtyq qylmysy oqtyn-oqtyn qaıtalanady. Sondaı-aq urlyq ta jıi jasalady. Degenmen byltyrǵyǵa qaraǵanda, aýyr qylmystardyń qatary 11,2 paıyzǵa azaıǵan.
«Máselen, 2024 jyly 536 qylmys tirkeldi. Bıyl jyl basynan beri tirkelgen 476 qylmystyń 339-y ashyldy. Al qalǵan qylmystyq ister boıynsha keshendi-tergeý amaldary júrgizilip jatyr. Osyǵan baılanysty tıisti saraptamalar taǵaıyndalyp, prosessýaldyq sheshim qabyldaý úshin tergeý jalǵasady», dep naqtylady baspasóz qyzmeti.
Ishki ister mınıstrligi tártip saqshylaryna adam óltirý qylmysyn jedel ashý mindetin júktep otyr. Sondaı-aq aýyr qylmystardyń aldyn alýǵa basymdyq berilgen.
«Atyraý oblysynda qasaqana adam óltirý qylmysynyń aldyn alý jáne jedel-profılaktıkalyq is-sharalaryn kúsheıtý maqsaty kózdeldi. Osyǵan baılanysty oblys ákimdigimen 2024–2026 jyldarǵa arnalǵan Jol kartasynyń jospary jasaqtaldy. Ishki ister mınıstrliginiń 2023 jylǵy 28 jeltoqsandaǵy №943 buıryǵymen «Urlyqtarǵa qarsy is-qımyl jónindegi 2024–2026 jyldarǵa arnalǵan baǵdarlamany iske asyrý jónindegi is-sharalary» jospary bekitildi. Qazir oblysta qabyldanǵan is-sharalardyń nátıjesinde qylmystyq quqyq buzýshylyqtyń tómendegeni baıqalady. Máselen, densaýlyqqa aýyr zııan keltirý (54,8%, 31-den 14-ke deıin), zorlaý (70%, 10-nan 3-ke), buzaqylyq (8,9%, 56-dan 51-ge), urlyq (13,5%, 297-den 257-ge), uıaly telefon urlyǵy (28,3%, 46-dan 33-ke), mal urlyǵy (60%, 15-ten 6-ǵa), alaıaqtyq (25%, 863-ten 647-ge deıin), tonaý (41,4%, 29-dan 17-ge), qaraqshylyq (50%, 4-ten 2-ge) qylmysy azaıdy», dedi departamenttiń baspasóz hatshysy Meıirim Erdáýlet.
Alaıda bul óńirde polısııa qyzmetkerleri izdeý salǵanymen, áli ustalmaǵan kúdiktiler bar. Izdeýde júrgender sany – 33.
«Jyl basynan bergi 4 aı 20 kúnde izdeý jarııalanǵan 59 kúdiktiniń 26-sy ustaldy. Kúdiktilerdiń basym bóligi alaıaqtyq jáne urlyq qylmysyn jasaǵany úshin izdestirilip jatyr», dep málimdedi baspasóz qyzmetinen.
Jurtshylyqty alańdatyp otyrǵan jaıttyń biri – esirtki qylmysy. Atyraý oblystyq polısııa departamenti bastyǵynyń birinshi orynbasary Quttybaı Sadyqovtyń málimetine súıensek, bıylǵy 5 aıda esirtkimen baılanysty 59 quqyq buzýshylyq, onyń ishinde 32 qylmys tirkelgen.
«Zańsyz aınalymnan jalpy salmaǵy 29 kılodan astam esirtki, asa aýyr sanatqa jatatyn 3 kıloǵa jýyq sıntetıkalyq esirtki zaty tárkilendi. Polısııa qyzmetkerleri júrgizgen jedel-izdestirý sharalarynyń nátıjesinde zańsyz 2 fıtozerthana, esirtki tasymaldaýdyń 3 arnasy joıyldy. О́zge de zań buzýshylyqtardy anyqtaý úshin júrgizilgen jumystyń nátıjesinde avtokólikti esirtkilik mas kúıde júrgizgen 17 adam jaýapqa tartyldy. Oblys aýmaǵynda esirtki tasymaldaýmen aınalysqan 14 kúdikti ustaldy. Kúdiktilerdiń altaýy ózge óńirlerden kelgeni, al ekeýiniń kolledj stýdenti ekeni anyqtaldy», deıdi Q.Sadyqov.
Kúdiktiniń biri – Qyzylorda oblysynan kelgen 17 jastaǵy jasóspirim. Ony tintý kezinde qara ızolentpen oralǵan 25 túıinshek tabyldy. Túıinshektiń árqaısysyna 1 gramm aq tústi untaq salynǵan. Saraptamanyń qorytyndysymen aq tústi untaqtyń «Alfa-PVP» sıntetıkalyq esirtki ekeni dáleldendi. Esirtkiniń jalpy salmaǵy – 24,7 gramm.
Al Inder aýdanynyń 37 jastaǵy turǵynynan salmaǵy 1 kılodan asatyn sıntetıkalyq esirtki alyndy. Qazir ustalǵan eki kúdikti qamaýǵa alynyp, qylmystyq is qozǵaldy.
Departament bastyǵynyń birinshi orynbasary málim etkendeı, polıseıler eriktilermen birge esirtki saıttaryn jarnamalaıtyn 60-qa jýyq graffıtı jazbasyn joıǵan. Internet jelisine monıtorıng júrgizilip, esirtki jarnamalaǵan 332 saıt anyqtalǵan. «Antıfrod» aqparattyq júıesimen kúdik týdyrǵan 673 esepshot anyqtalyp, ondaǵy 30 mln teńge jýyq qarjy buǵattalyp otyr.
Atyraý oblysy
