Qazirgi tańda elimizdiń 122 joǵary oqý ornynda 680 myńǵa jýyq stýdent bilim alyp jatyr. Osy sannyń artynda árqaısysynyń jeke máselesi men quqyǵy bar. Bul turǵyda bilim alýshy jastardyń akademııalyq erkindigi men áleýmettik ál-aýqaty úshin jaýap beretin ombýdsmender ınstıtýty mańyzdy ról atqaryp keledi. Mınıstrlik ókili Aqerke Abylaıhannyń aıtýynsha, stýdenttik ombýdsmender ınstıtýty elimizdiń barlyq óńirinde eki jyldan beri jumys isteıdi. «Búgingi tańda órkenıetti eldiń azamaty retinde bilim alýshy jastar tek bilim emes, joǵary rýhanı qundylyqtarǵa da ıe bolýy qajet. Mınıstrlik bul baǵytta «Tolyq adam» ıdeologııasyn alǵa tarta otyryp, tárbıelik jumystardy jańa deńgeıge kóterip otyr. Akademııalyq adaldyqty saqtaý – bilim berýdegi negizgi qaǵıdalardyń biri. Osy maqsatta 18 joǵary oqý orny múshe bolǵan Akademııalyq adaldyq lıgasy quryldy», dedi ol.
Onyń aıtýynsha, stýdentterdiń akademııalyq jáne áleýmettik máselelerin sheshý úshin psıhologııalyq kómek ortalyqtaryn uıymdastyrý, komplaens-qyzmetterdi jetildirý, sybaılas jemqorlyqqa qarsy jańa standarttardy engizý sııaqty sharalar qabyldanyp jatyr. Jastar arasynda volonterlik pen ózin-ózi basqarý júıesi de damyp keledi. Máselen, búginde joǵary oqý oryndarynda 100-den astam debat klýby, 120-dan astam ekologııalyq jáne shyǵarmashylyq klýb jumys isteıdi.
Mınıstrdiń keńesshisi Toqtar Bolysov 2024–2025 oqý jylyndaǵy stýdenttik ombýdsmender qyzmetiniń nátıjesin baıandady. «Bıyl stýdenttik ombýdsmenderge 6 079 ótinish tústi. Olardyń basym bóligi akademııalyq ádiletsizdik, jataqhana, áleýmettik-turmystyq máselesine qatysty boldy. 1 jyl ishinde ombýdsmender tarapynan 100-den astam josparly jáne 20-dan astam jospardan tys tekseris júrgizildi. Bul jumys oqý men turmys jaǵdaılaryn jaqsartýǵa múmkindik berdi», dedi ol.
Brıfıng barysynda Toqtar Bolysov stýdentterdiń pikirlerine arnalǵan jańa baqylaý formatyn da atap ótti. Onyń aıtýynsha, Shymkent qalasynda «2GIS» platformasy men áleýmettik jelilerdegi stýdentterdiń pikirleri saralanyp, keıbir ýnıversıtetterde júıeli kemshilikter anyqtalǵan. Málimetter oqý oryndaryna joldandy. Endi shilde-tamyz aılarynda qaıta monıtorıng júrgiziledi. Osy rette aqparattyq-aǵartýshylyq jumystar da nazardan tys qalmaǵan. Jastardyń quqyqtyq saýattylyǵyn arttyrý úshin dárister, keńes berý kezdesýi jáne áleýmettik jelide jarııalanymdar uıymdastyrylǵan. Sonymen qatar «Stýdenttik ombýdsmender mektebi» aıasynda adam quqyqtary, kommýnıkasııa, qaqtyǵystardy sheshý jáne ýnıversıtet ákimshiligimen ózara árekettesý boıynsha trenıngter ótkizilgen.
Respýblıkalyq stýdenttik ombýdsmen Ulan Naýken jastardyń quqyqtyq mádenıetin qalyptastyrý men ashyq dıalogti damytýda mınıstrlik pen Qazaqstan stýdentteriniń alıansy arasyndaǵy seriktestiktiń mańyzdylyǵyna toqtaldy. «Biz – stýdent pen ýnıversıtet arasyndaǵy ashyq ári senimdi dıalogtiń quralyna aınaldyq. Ombýdsmender qazirgi tańda stýdentterdiń máselelerin ýnıversıtet ákimshiligi men basqa da tıisti organdarǵa jetkize otyryp, olardyń quqyqtaryn qorǵaýǵa yqpal etip keledi», dedi U.Naýken. Onyń aıtýynsha, jyl basynan beri stýdenttik ombýdsmenderdiń bastamasymen 200-den astam qoǵamdyq shara, quqyqtyq kezdesýler, sporttyq jáne shyǵarmashylyq baıqaýlar, ekologııalyq aksııalar, debat týrnırleri, ótkizilgen. Sondaı-aq stýdenttik ózin-ózi basqarý júıesin nyǵaıtýǵa baǵyttalǵan «Studunion» jobasy arqyly elimizdiń joǵary oqý oryndarynda stýdentterdiń ókildik ınstıtýttary damyp, jastardyń basqarý úderisine aralasýyna múmkindik berilgen.
Brıfıng qorytyndysynda spıkerler stýdenttik ombýdsmender ınstıtýtyn ári qaraı damytý úshin zańnamalyq jáne uıymdastyrýshylyq tetikterdi kúsheıtý qajet ekenin atap ótti.
