Sýret: kazgazeta.kz
Forýmǵa memlekettik organdar, úkimettik emes uıymdar, qoǵamdyq keńester, Qazaqstan halqy Assambleıasy, jastar uıymdary men medıa ókilderi qatysyp, azamattyq mádenıettiń kúndelikti ómir sapasyna qalaı áser etetindigi týraly keleli pikir aıtyp, aqyl tarazysyna saldy. Forýmǵa qatysýshylar quqyqtyq saýattylyq pen qoǵamdyq baqylaý, ınklıýzııa, jergilikti ózin-ózi basqarý, ekologııa, sıfrlandyrý tárizdi aýqymdy taqyryptardy jan-jaqty jiktep, damytý joldaryn qarastyrdy. Saıyp kelgende bul tájirıbe taldamalyq, utymdy usynystardy, ońtaıly ádis-tásilderdi qoldana bilýge jol silteıtin tyń oılar terbetilgen besik ispetti.
Forým bes baǵyt boıynsha tyńǵylyqty jumys istedi. Zańnama men ınstıtýsıonaldyq dıalogten bastap, jasandy ıntellekt, kreatıvti ekonomıka jaǵdaıynda úshinshi sektordyń beıimdelýine deıin mańyzdy taqyryptar qozǵaldy. Memlekettiń azamattyq qoǵamdy damytý tujyrymdamasyn iske asyrýǵa arnalǵan seksııada meılinshe mazmundy dıalog órbidi. 2020–2025 jyldarǵa arnalǵan tujyrymdamanyń alǵashqy kezeńiniń nátıjeleri naqty kórsetkishter arqyly usynyldy:
– Biz júıeli reformalar júrgizdik. «Qoǵamdyq baqylaý týraly» zań qabyldandy, toǵyz zańnamalyq aktige ózgerister engizildi, birlestikterdi tirkeý jeńildedi, endi úsh adamnyń ózi jetkilikti. Onlaın-petısııalar, jańa granttar men syıaqy formattary paıda boldy. Eń bastysy, ÚEU-ǵa degen senim nyǵaıyp, olar áleýmettik seriktes retinde qabyldana bastady, – dedi Mádenıet jáne aqparat mınıstrligi Azamattyq qoǵam isteri komıtetiniń tóraǵasy Gúlbara Sultanova.
Memleket pen qoǵam arasyndaǵy sapaly áriptestik, barlyq rásimderdi sıfrlandyrý, strategııalyq seriktestikti damytý, jergilikti bastamalardy qoldaý basty basymdyq bolmaq.
– Búgingi mindet – sandyq jetistikterden sapaly, ózara tıimdi áriptestikke kóshý. ÚEU jaı ǵana jobalardy oryndaýshy emes, olar – bilim, motıvasııa men senim taratýshy orta, – dedi Qazaqstan Azamattyq alıansynyń prezıdenti Baný Nurǵazıeva.
Quqyqtyq mádenıetke arnalǵan seksııada aqparatqa qoljetimdilik, quqyqtardy qorǵaý, ekologııa, zorlyq-zombylyqtyń aldyn alý taqyryptary talqylandy. Senator Janna Asanovanyń pikirinshe, quqyqtyq mádenıet – fakýltatıv emes, qajettilik.
Inklıýzııa máseleleri jeke baǵyt retinde qaraldy. «Qazaqstan halqyna», Bolat О́temuratov qorlarynyń ókilderi erekshe bilim berý qajettiligi bar balalardy qoldaý, mamandardy oqytý, bilimge teń qoljetimdilikti qamtamasyz etý jóninde óńirlerde júzege asyrylyp jatqan jobalarmen tanystyrdy.
«Ashyq júrek – Otkrytoe serdse» qorynyń jetekshisi azamattyq sektor týraly kózqarastyń keıingi jyldary qalaı ózgergenin aıtty:
– Búginde úkimettik emes uıymdar uǵymy árbir adamǵa túsinikti. Adamdar kórip otyr: memleket úlgermeı jatqan jerlerde biz kómekke kelemiz. Bul – bıznes te, saıasat ta emes, adamgershilik pen ózgeriske umtylý, – dedi Olesıa Jagparova.
Forýmnyń plenarlyq otyrysy onyń logıkalyq qorytyndysy boldy. Aqmola oblysy ákiminiń orynbasary Dosulan Aıtbaev quttyqtaý sóz sóıledi. Forým qorytyndysy boıynsha óńirlerde úkimettik emes uıymdardy qoldaý ınfraqurylymyn damytý, memlekettik tapsyrys tetikterin jetildirý, jańa sıfrlyq servısterdi engizý, sheshim qabyldaý úderisterine qoǵamdyq uıymdardyń júıeli qatysýyn qamtamasyz etý jóninde naqty usynystar engizilgen qarar qabyldandy. Eń belsendi qatysýshylar oblys ákimi men Azamattyq alıans atynan alǵyshattarmen marapattaldy.
KО́KShETAÝ
