Sýretti túsirgender – A.Dúısenbaev, E.ÚKIBAEV
Prezıdent aldymen Aqtóbe qalasynda Keńes Odaǵynyń batyry Álııa Moldaǵulovanyń memorıaldyq eskertkish keshenine gúl shoǵyn qoıyp, onyń rýhyna bir mınýt únsizdikpen taǵzym etti. Bıyl qazaqtyń qaısar qyzynyń týǵanyna 100 jyl tolyp otyr.
Memleket basshysy Álııa Moldaǵulovanyń eskertkishi janynda jergilikti jurtshylyqpen kezdesip, sóz sóıledi.
– Álııa Moldaǵulova – halqymyzdyń qaısar qyzy. Búgin 100 jyldyǵyna oraı arnaıy keldim. Bul, eń aldymen, azamattyq boryshym. Taǵzym etý úshin kelip otyrmyn. Barshańyzǵa kóp rahmet. Álııanyń esimin halqymyzdyń arasynda, shetelde keń aýqymda dáripteýimiz kerek. Ol – bizdiń maqtanyshymyz. Sondyqtan onyń esimi bizdiń jadymyzda máńgi saqtalady, – dedi Qasym-Jomart Toqaev.
Sondaı-aq Prezıdent qazirgi almaǵaıyp zamanda birlikti, tatýlyqty saqtaý óte mańyzdy ekenine nazar aýdardy.
Sodan soń Prezıdent – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev XI halyqaralyq «Aıbyn» áskerı-patrıottyq jastar jıynynyń ashylý rásimine qatysty.
Bıyl Qazaqstan, Ázerbaıjan, Belarýs, Qyrǵyzstan, Reseı jáne О́zbekstan elderiniń áskerı-patrıottyq qozǵalystaryna múshe 800-ge jýyq jastyń basyn qosqan is-shara Aqtóbe oblysynda uıymdastyryldy. Slet qos ataýly dataǵa – Uly Jeńistiń 80 jyldyǵyna jáne qazaq halqynyń batyr qyzy Álııa Moldaǵulovanyń 100 jyldyq mereıtoıyna arnalady.
Qasym-Jomart Toqaev barsha qatysýshyny «Aıbyn» áskerı-patrıottyq jastar jıynynyń ashylýymen quttyqtap, bul jas órenderimizdiń rýhyn shyńdaıtyn óte mańyzdy is-shara ekenine nazar aýdardy.
– Bıyl «Aıbyn» jıyny qazaqtyń qaısar qyzy, Keńes Odaǵynyń batyry Álııa Moldaǵulovanyń týǵanyna 100 jyl tolýyna arnalyp otyr. Erjúrek mergen qyzdyń erligi halqymyzdyń jáne dostas elderdiń tarıhyna altyn árippen jazylǵan. Qazaqtyń qarshadaı qyzy soǵysqa attanyp, birden qan maıdannyń ortasyna tústi. Ol surapyl shaıqastarda teńdessiz erlik pen Otan aldyndaǵy paryzǵa adaldyq úlgisin kórsetti. Bıyl Uly Jeńiske – 80 jyl! Bul – bizdiń elderimizge ortaq tarıhı mereke. Uly Jeńis kúnin atap ótý – batyr babalardyń rýhyna taǵzym etý, olardyń erligin jadymyzda jańǵyrtý degen sóz. Qazaqstan úshin munyń mán-maǵynasy aıryqsha. Halqymyz Uly Jeńiske ólsheýsiz úles qosty, azattyq pen ádildik úshin aıanbaı kúresti. Qazaqstannan 1 mıllıon 200 myń azamat maıdanǵa attandy, onyń teń jartysy erlikpen qaza tapty. Myńdaǵan adam dalada, zaýyttar men fabrıkalarda eńbek etip, maıdanǵa azyq-túlik, qarý-jaraq jáne oq-dári jiberdi. Biz dańqty erlerimiz ben tyl eńbekkerlerin eshqashan umytpaımyz, olardyń esimin máńgi este saqtaımyz. Batyrlarymyz jer-jahandaǵy beıbitshilik pen tynyshtyq úshin asa aýyr synaqtardy eńserdi, – dedi Memleket basshysy.
Prezıdenttiń aıtýynsha, qazirgi qubylmaly, bulyńǵyr zamanda biz osy tarıhı aqıqatqa adal bolýymyz kerek, zulmat soǵystyń qasiretti sabaǵyn umytpaýymyz qajet.
– Jastar beıbit zamannyń qadirin túsinýge tıis. Jyl ótken saıyn jahandyq shıelenister órship, memleketter arasynda qaqtyǵystar jıilegenin kórip otyrsyzdar. Qazirgi asa kúrdeli ýaqytta elderimiz arasyndaǵy túsinistik, ózara senim men kelisim óte mańyzdy ról atqarady. Búgingi jarystar bizdiń sheteldermen kópjaqty baılanystarymyzdy keńeıtýge úles qosady, – dedi Qasym-Jomart Toqaev.
Memleket basshysy ásker qatarynda bolý abyroıly mindet ekenin atap ótip, elimiz óskeleń urpaqtyń áskerı-patrıottyq tárbıesine basa mán beretinin jetkizdi.
– Qýatty Armııa – táýelsizdik tiregi, qarqyndy damý kepili. Búgin sapta turǵan sarbazdar – naǵyz otanshyl, batyl, myqty azamattar. Qazaqstan Armııasynyń keleshegi sizderdiń qoldaryńyzda! Ádiletti jáne Qaýipsiz Qazaqstandy quratyn da – Sizder. Men Joǵarǵy Bas qolbasshy retinde elimizdiń bilimdi, adal, ozyq jastaryna senemin! Aldaǵy kúnderi sizderdiń qanshalyqty kúshti ári epti ekenderińiz synalady. Áskerı qyzmettiń qandaı bolatynyn sezinip, zamanaýı armııanyń ozyq tehnologııalarymen tanysasyzdar. Naǵyz jaýynger tabandy eńbek, qatań tártip pen jaýapkershilik qana jeńiske jetkizetinin biledi. Taktıkalyq oıyndar kezinde sizderge batyldyq pen sheshimtaldyq qajet bolady. Komandamen uıymdasa áreket etý, bir-birińe kómektesý talap etiledi. Búgin osy jıynda Qazaqstannyń namysyn «Jas sarbaz» áskerı-patrıottyq qozǵalysynyń eń úzdik músheleri qorǵaıdy. Jastarymyz jarysqa laıyqty deńgeıde qatysyp qana qoımaı, ózderin osy eldiń qonaqjaı ári keńpeıil ıesi retinde kórsetetinine senimdimin. Osy jıynnan jańa daǵdy úırenip, adal dos taýyp, keremet ásermen oralýlaryńyzǵa tilektespin. Barshańyzǵa sáttilik tileımin! – dedi Qasym-Jomart Toqaev.
Jıyn aıasynda balalar men jasóspirimder «Aıbyn daryny» ıntelektýaldyq oıynyna, «Smart Sarbaz» tehnologııalyq konkýrsyna jáne «Aıbyn» juldyzy shyǵarmashylyq saıysyna qatysady. Pnevmatıkalyq myltyqtan atý, Kalashnıkov avtomatyn shashyp, qaıta jınaýdan jarysady. Sondaı-aq baǵdarlamada sporttyq saıystar, «Kúshimiz birlikte» áskerı-taktıkalyq oıyny bar. Keshqurym jastar alaý basynda patrıottyq ánder oryndaıdy.
Resmı ashylý saltanatynan keıin Memleket basshysyna Qorǵanys mınıstri, avıasııa general-leıtenanty Dáýren Qosanov FPV-dron operatorlaryn daıarlaıtyn ınnovasııalyq oqý-jattyǵý kesheni men ushqyshtarǵa arnalǵan zamanaýı jattyǵý sımýlıatorlaryn tanystyrdy.
Odan keıin Prezıdent «Smart sarbaz» jas robot tehnıkteri úıirmesiniń jumysymen tanysty. Sondaı-aq balalardyń «Jas sarbaz» áskerı-patrıottyq úrmeli aspaptar orkesteriniń oryndaýyndaǵy mýzykalyq shyǵarmany tyńdady.
