Keshe Astanada mádenı jáne bilim baǵdarlamalary arqyly sybaılas jemqorlyqqa qarsy dúnıetanymdy nyǵaıtý men keńeıtýge baǵyttalǵan jobanyń tanystyrylymy ótti. Oǵan Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı, Mádenıet jáne aqparat mınıstri Aıda Balaeva, Parlament depýtattary, memlekettik organdar men uıymdardyń basshylary, memleket jáne qoǵam qaıratkerleri, eldiń ǵylymı jáne shyǵarmashylyq zııaly qaýym ókilderi qatysty.
Jıynda alǵashqy sózdi alǵan agenttik tóraǵasy A.Jumaǵalı qazaq halqynyń ulttyq dástúrleri ejelden-aq ádildik, adaldyq pen parasat qundylyqtaryn qalyptastyrǵanyn atap ótip, qolǵa alynyp jatqan jańa bastamanyń bolashaǵy jarqyn bolaryna senim bildirdi.
«Qazaq dúnıetanymyndaǵy bul ıdealdar urpaqtan-urpaqqa berilip, ańyzdardan, maqaldardan, óleńder men ádet-ǵuryptan kórinis tapty. Rýhanı muraǵa baı ulttyq mádenıet halyq arasynda adamgershilik normalary men qaǵıdattardy qurmetteýdi tárbıeleýge negiz boldy. Osylaısha, ulttyq murany, otbasylyq jáne qaýymdyq dástúrlerdi qurmetteý arqyly sybaılas jemqorlyqqa qarsy qundylyqtardy qura otyryp, adal qoǵamdy qalyptastyrý úshin berik irgetas qalaımyz», dedi ol.
Mádenıet jáne aqparat mınıstri A.Balaeva óz sózinde ádil qoǵam qurý jolynda birlesip áreket etý, rýhanı qundylyqtardy saqtaý men dáripteý basty paryzymyz ekenin aıta kele, «Ádil qoǵam» jobasy osy ortaq múdde jolyndaǵy naqty qadamdardyń biri ekenin tilge tıek etti.
«Memleket basshysy quqyq qorǵaý organdarynyń keńeıtilgen alqa otyrysynda elge jáne zańǵa qyzmet etýge bel býǵan árbir azamat adamgershilik pen ádildik qundylyqtaryn basshylyqqa alatynyn ári mundaı qasıetter eń aldymen tárbıe arqyly beriletinin atap ótken edi. Sondyqtan biz ár azamattyń boıyna adaldyqty darytý, jastardy parasat pen izgilikke baýlý jolynda birlese jumys isteýge tıispiz. Osylaı ǵana turaqty, senimdi, adamgershilikke negizdelgen qoǵamdy qalyptastyra alamyz. Prezıdent atap ótkendeı, 2019 jyldan beri qylmystyq quqyqbuzýshylyq sany shamamen eki ese azaıǵan. Sonyń ishinde qaraqshylyq, tonaý, urlyq pen buzaqylyq deńgeıi 4 ese tómendep, kisi óltirýge qatysty qylmys 30 paıyzǵa kemigen. Taǵy bir aıta keterligi, qoǵamdyq oryndardaǵy qylmys sany 80 paıyzǵa tómendegeni belgili bolyp otyr», dedi mınıstr.
A.Balaeva Mádenıet jáne aqparat mınıstrligi qoǵamdyq damý, azamattyq ustanymdy qalyptastyrý, jastardyń ıntellektýaldy jáne shyǵarmashylyq áleýetin arttyrý, aqparattyq-ıdeologııalyq nasıhat jumystary boıynsha birqatar naqty jobany júzege asyryp jatqanyn atap ótti. Mınıstrdiń aıtýynsha, mádenıet – jaı ǵana estetıkalyq keńistik emes, ulttyń jan dúnıesi, adamgershilik ólshemi. Sondyqtan mádenıet pen parasat, ádildik pen adaldyq árdaıym qatar júrýge tıis.
«Ádil qoǵam» jobasy osy baı murany zamanaýı aǵartý isimen ushtastyryp, sybaılas jemqorlyqqa qarsy qoǵamdyq sana men mádenıetti qalyptastyrýdy kózdeıdi. Bul bastamaǵa shyǵarmashylyq zııaly qaýym, mádenıet salasy ókilderi men úkimettik emes uıymdardy qosyp, ortaq múddege jumyldyrýdyń mańyzy zor dep bilemiz. Ony júzege asyrý barysynda mádenı muramyzdy, ashyq dıalogke arnalǵan alańdardy, teatr men kórkemónerdiń múmkindigin keńinen paıdalanýǵa nıettimiz. Sebebi shynaıy ózgeris adamnyń ishki dúnıesinen, sana ózgerisinen bastalady», dedi ol.
Osy jobaǵa uıytqy bolǵan uıymnyń biri IýNESKO qamqorlyǵyndaǵy Mádenıetterdi jaqyndastyrý ortalyǵy basshysynyń orynbasary Saltanat Áshimova jańa bastama halqymyzdyń asyl muralaryn jańǵyrta otyryp, ony qazirgi qoǵamǵa beıimdeýdi, rýhanı qundylyqtardy sybaılas jemqorlyqqa qarsy mádenıetpen ushtastyrýdy kózdeıtinin aıta kele, naqty qandaı is-sharalar júzege asatynyn aıtyp ótti.
«Abaı, Shákárim, Buqar jyraý jáne basqa da oıshyldardyń eńbekteri negizinde pikirtalastar, ádebı keshter, dıalogtik klýbtar ótkizý, adaldyq pen ádilet taqyrybynda beınerolıkter, podkastar, derekti fılmder ázirleý, jastar arasynda túrli baıqaý uıymdastyryp, halyq aýyz ádebıetindegi izgilikke qatysty mátinderdi, qanatty sózderdi jınaqtaý, «Uly dala ádebiniń kodeksi» atty kitap shyǵarý, teatrlandyrylǵan qoıylymdar men mádenı festıvaldar ótkizý, oqý oryndarynda arnaıy kýrstar, trenıngter, semınarlar, halyqaralyq deńgeıde forýmdar, konferensııalar, dóńgelek ústelder uıymdastyrý jáne mádenı yntymaqtastyq ornatý kózdelip otyr. Jobanyń júzege asýy – parasattylyq mádenıetin qalyptastyrýdyń tıimdi quraly», dedi ol.
Is-shara barysynda senator Nurtóre Júsip, Májilis depýtattary Marat Báshimov pen Aıdos Sarym, aqyn Aqushtap Baqtygereeva, ózge de qatysýshylar sóz alyp, «Ádil qoǵam» jobasynyń mindetteri men keleshegi jaıynda oılaryn ortaǵa saldy.
«Prezıdent Qasym-Jomart Toqaev aıtqandaı, «Ádiletti Qazaqstandy qurý – jaı uran emes, naqty is-qımyl jospary. Árbir azamat óz elinde laıyqty ómir súrýge quqyly». Sondyqtan bul – árqaısymyzdyń ortaq boryshymyz, ortaq maqsatymyz. Árbirimiz óz salamyzda ádilettilik qaǵıdatyn ustanyp, qoǵamnyń damýyna úles qosýymyz kerek», dedi Senat depýtaty N.Júsip.
Jıynǵa qatysýshylar bul joba qoǵam belsendilerin, belgili qoǵam qaıratkerlerin biriktirip, ashyq qoǵamdyq dıalog alańyna aınalaryna senim bildirdi.
