Jobanyń basty maqsaty – jastardyń nazaryn qarjylyq qaýipsizdik pen alaıaqtyqqa qarsy kúreske aýdarý, zamanaýı qaýipterden saqtanýǵa úndeý.
Oıynǵa elimizdiń 9 óńirinen kelgen komandalar qatysyp, qarjy pıramıdalary, ınternet-alaıaqtyq, droptar, bank kartalaryna qatysty qaýipter, jalpy qarjylyq saýattylyq taqyryptaryn kúlkige oraı sheber órip, sahnada ózara baq synady. Jastardyń belsendiligi men kreatıvi, mańyzdy máselelerdi jeńil ári ótkir jetkizý qabileti kórermenderdiń ystyq yqylasyna ıe boldy.
Agenttik ókilderiniń aıtýynsha, jastarmen dıalog ornatýda osyndaı formattaǵy jobalar tıimdiligin kórsetip otyr. Ásirese qazirgi zamanǵy alaıaqtyq túrleriniń kúrdelene túskenin eskersek, qoǵamda qarjylyq saýattylyqty arttyrý – ulttyq qaýipsizdikpen deńgeıles másele.
«Zańdy kúlki» jobasy – ázil arqyly mańyzdyny aıtýǵa bolatyndyǵyn dáleldegen tyń bastama.
