Forým aıasynda erikti túrde qonys aýdarý arqyly eńbek naryǵyndaǵy teńgerimsizdikti sheshýge baǵyttalǵan is-sharalar legi uıymdastyrylyp otyr. Bul maqsatta arnaıy bos jumys oryndary jármeńkesi ótip, oǵan jumys berýshiler men jumys izdeýshi azamattar qatysty.
Nurbol Doldashevtiń aıtýynsha, forýmǵa qatysýǵa balalar úıleri men aýyldarynyń tárbıelenýshileri, jetim balalar men ata-anasynyń qamqorlyǵynsyz qalǵan 16–23 jas aralyǵyndaǵy mektep-ınternat túlekteri ótinish bere alady. Sonymen qatar, basymdyq ekonomıkalyq sebeptermen, shtattyń qysqarýyna baılanysty nemese óndiristik kólemniń azaıýyna oraı jumystan bosatylǵan azamattarǵa beriledi.
Oblystyq jumyspen qamtýdy úılestirý jáne áleýmettik baǵdarlamalar basqarmasy kóshi-qon bóliminiń basshysy Laýra Mahmýtova atap ótkendeı, forým barysynda soltústik óńirlerdiń ókilderi qatysatyn arnaıy «Qonys aýdarý» jármeńkeleri de uıymdastyrylyp jatyr. Bul jármeńkeler oblystyń barlyq aýdandary men qalalaryn qamtıdy.
Qonys aýdarýshylarǵa memleket tarapynan jan-jaqty qoldaý kórsetiledi. Atap aıtqanda:
-
otbasynyń árbir múshesine 275,2 myń teńge kóleminde bir rettik materıaldyq kómek qarastyrylǵan;
-
turǵyn úıdi jaldaý jáne kommýnaldyq qyzmetterge arnalǵan shyǵyndardy óteý úshin 12 aı boıy 15–30 AEK kóleminde (ıaǵnı, 58 980–117 960 teńge aralyǵynda) tólem usynylady.
Erikti qonys aýdarý baǵdarlamasyna qatysý úshin turǵylyqty mekenjaıy boıynsha mansap ortalyqtaryna júginý qajet. Bıylǵy óńirlik kvota aıasynda qonys aýdarýshylardy qabyldaıtyn oblystar – Abaı, Qaraǵandy, Qostanaı, Pavlodar, Soltústik Qazaqstan, Ulytaý jáne Shyǵys Qazaqstan.
Mańǵystaýdaǵy bul forým tek eńbek resýrstarynyń teńgerimdi bólinýine yqpal etip qoımaı, áleýmettik jaǵynan osal toptaǵy jastardyń óz bolashaǵyn josparlap, jańa aımaqtardan oryn tabýyna da múmkindik bermek. Osylaısha, jumys kúshi tapshylyǵy baıqalatyn óńirlerge kásibı mamandardy tartý men el ishindegi demografııalyq jáne ekonomıkalyq teńgerimdi saqtaý máseleleri sheshimin tabýǵa bir qadam jaqyndaı túsedi.
